আৰিয়ানলৈ শ্বাহৰুখৰ ৪৫০০ টকাৰ মণি অৰ্ডাৰ; কাৰাগাৰত দিন নাযায়, ৰাতি নুপুৱায় বাদশ্বাহ তনয়ৰ

ডিজিটেল ডেস্কঃ ড্ৰাগছৰ সেৱন আৰু সৰবৰাহৰ অভিযোগত সম্প্ৰতি কাৰাগাৰত বন্দী হৈ আছে বলীউডৰ বাদশ্বাহ শ্বাহৰুখ খানৰ পুত্ৰ আৰিয়ান খান। দিন-ৰাতি যেন নাযায় নুপুৱায়। বিলাসী-স্বাচ্ছন্দ্য জীৱন কটোৱা আৰিয়ান খান এতিয়া পোতাশালত বন্দী। কি জীৱন কি হৈ গ'ল বুলি কাৰাগাৰৰ চাৰি বেৰৰ মাজত সোমাই হুমুনিয়াহ কাঢ়িছে আৰিয়ানে। তীব্ৰ মানসিক চাপত আৰু অসহজ অৱস্থাত আৰিয়ান আছে বুলি জনাইছে কাৰাগাৰ কৰ্তৃপক্ষই। ক’ভিড প্ৰট’কল অনুসৰি আৰিয়ানক বুধবাৰপৰ্যন্ত কাৰাগাৰৰ কোৱাৰেণ্টাইন কোঠাতে ৰখা হৈছিল। কোৱাৰেণ্টাইনৰ ম্যাদ শেষ হোৱাৰ লগতে ক’ৰ’না পৰীক্ষাৰ ফলাফল নিগেটিভ অহাত সাধাৰণ বেৰেকলৈ স্থানান্তৰ কৰা হৈছে আৰিয়ান খানক।

আৰিয়ান খানৰ নতুন পৰিচয় এতিয়া কয়দী নম্বৰ এন৯৫৬। কাৰাগাৰত ইজনে সিজনক নম্বৰ অনুসৰি মাতে। তেনেস্থলত আৰিয়ান খানক এতিয়া এন৯৫৬ নামেৰে মতা যাব। ২০ অক্টোবৰত পুনৰ জামিনৰ শুনানি আছে আৰিয়ান খানৰ। উল্লেখ্য যে কাৰাগাৰৰ কেণ্টিনত খাদ্য খাবলৈ পৰিয়ালৰ ফালৰ পৰা ৪৫০০ টকা আৰিয়ানলৈ মণি অৰ্ডাৰ কৰি পঠাইছে পৰিয়ালৰ লোকে। কাৰাগাৰৰ নিয়ম অনুসৰি এজন কয়দীক এটা মাহত পৰিয়ালৰ লোকে কেৱল মাত্ৰ ৪৫০০ টকা পঠিয়াব পাৰিব। তাতকৈ এক টকাও বেছি দিব নোৱাৰিব। কাৰাগাৰৰ নিয়ম মানিয়েই ৪৫০০ টকা আৰিয়ানলৈ পঠাইছে শ্বাহৰুখ খানে।

উল্লেখ্য যে আৰিয়ানৰ ভৱিষ্যতৰ চিন্তান খাৱন-শোৱন নাইকিয়া হৈছে শ্বাহৰুখ-গৌৰীৰ। মানসিক ভাৱে ভাগি পৰিছে দুয়ো। ছলমান খান, কৰণ জোহৰ, প্ৰীতি জিণ্টাৰ দৰে অনেক চেলিব্ৰেটীয়ে এতিয়া মানসিক শক্তি যোগাবলৈ শ্বাহৰুখ-গৌৰীৰ বাসভৱন 'মন্নত'লৈ অহা যোৱা কৰি আছে।