ডিজিটেল ডেস্কঃ ৰূপহীহাটত দুষ্কৃতিকাৰীৰ দলৰ আক্ৰমণৰ পিছতে শুকুৰবাৰে নগাঁও সদৰ থানাত ২২ জন ব্যক্তিৰ বিৰুদ্ধে এফআইআৰ দাখিল কৰে কংগ্ৰেছৰ জ্যেষ্ঠ নেতা ৰকিবুল হুছেইনে।
ধুবুৰীৰ সাংসদ ৰকিবুল হুছেইনে কয় যে ‘‘কালি মই অভিযোগ দাখিল নকৰো বুলি কৈছিলো, কিন্তু আজি কৰিব লগা হৈছে। এই আক্ৰমণত জড়িত আৰক্ষী অধীক্ষক। ইয়াৰ পৰাই বুজা যায় যে বিজেপিয়ে কংগ্ৰেছক কেনেদৰে ভয় কৰে। ২২ জন ব্যক্তিৰ বিৰুদ্ধে এজাহাৰ দাখিল কৰিছো।’’
ইয়াৰ পিছতে গুৱাহাটীৰ ৰাজীৱ ভৱনত হুছেইনৰ ওপৰত কৰা আক্ৰমণক গৰিহণা দি প্ৰতিবাদৰ সৃষ্টি হয়।
‘আগন্তুক ২০২৬ চনৰ নিৰ্বাচনৰ বাবে বিজেপিয়ে ভয় খাইছে। তেওঁলোকে কংগ্ৰেছৰ ওপৰত ‘গুণ্ডা ৰাজ’ কৰি আমাক দুৰ্বল কৰি তুলিব বিচাৰিছে। যদি তেওঁলোকে ভাবে যে ক্ষমতাৰ অপব্যৱহাৰে ২০২৬ চনৰ নিৰ্বাচনত জয়ী হোৱাত সহায় কৰিব, তেন্তে তেওঁলোকৰ ভুল। আমি হিমন্ত বিশ্ব শৰ্মাৰ পদত্যাগৰ দাবী জনাইছো।’ এনেদৰে কয় কংগ্ৰেছৰ নেতাসকলে।
নগাঁও থানাত হুছেইনৰ সৈতে থকা অসম প্ৰদেশ মহিলা কংগ্ৰেছৰ সভানেত্ৰী মীৰা বৰঠাকুৰ গোস্বামীয়েও এই আক্ৰমণক তীব্ৰ গৰিহণা দিয়ে। তেওঁ কয় যে ‘ৰকিবুলক যিদৰে আক্ৰমণ কৰা হৈছিল, মই সদৰ থানাত আৰক্ষীক ক’ব বিচাৰিছো, মুখ্যমন্ত্ৰীৰ নিৰ্দেশ অন্ধভাৱে পালন কৰিলে তেওঁলোক নিৰাপদ নহয়। এজন আৰক্ষী বিষয়াই দায়িত্ব লৈ নিজৰ কৰ্তব্য পালন কৰক, কাৰণ বিজেপিৰ ক্ষমতা চিৰদিন নাথাকিব।”
ইয়াৰ পূৰ্বে মুখ্যমন্ত্ৰী হিমন্ত বিশ্ব শৰ্মাই মাইক্ৰ’ব্লগিং ৱেবছাইটত গৈ কংগ্ৰেছ সাংসদগৰাকীৰ ওপৰত সংঘটিত আক্ৰমণৰ অভিযোগত জড়িত ব্যক্তিসকলক আৰক্ষীয়ে চিনাক্ত কৰা বুলি নিশ্চিত কৰে।
জানিব পৰা মতে জামতোলাৰ হাৰুণ, ফকলিৰ হৰেশ, তামুলিটুপৰ বাছিৰ, কাৱোইমাৰীৰ কাচেম আলী, কাৱোইমাৰীৰ ৰ’ছিদুল, ৰে’ল ষ্টেচনৰ আয়ুব গুনাবাৰী, ৰে’ল ষ্টেচনৰ লুটকিয়ৰ, ৰৌমাৰীৰ খালেকে, গোৰেমাটিখোৱাৰ মজিবুৰ আৰু কোয়াচগাঁৱৰ জাহাংগীৰ এই ঘটনাৰ লগত জড়িত আছিল।
হুছেইনৰ ওপৰত হোৱা আক্ৰমণৰ ফলত ৰাজ্যৰ কেইবাটাও প্ৰান্তত প্ৰতিবাদৰ সৃষ্টি হৈছে।
Continue Reading
