আলিয়া ভাটৰ পৰা কোন বলীউড তাৰকাই বিচাৰিছে কাম?

নতুন দিল্লীঃ বলীউডৰ জনপ্ৰিয় অভিনেত্ৰী আলিয়া ভাটে নতুন ছবি ‘ডাৰ্লিংছ’ৰ শ্বুটিঙৰ কাম আৰম্ভ কৰিছে। টুইটাৰৰ জৰিয়তে এই কথা প্ৰকাশ কৰিছে মোহময়ী অভিনেত্ৰী গৰাকীয়ে। আলিয়া ভাটক শুভকামনা জনাইছে বলীউড কিং শ্বাহৰুখ খানে। শুভকামনাৰ লগতে মহাতাৰকা গৰাকীয়ে আলিয়া ভাটৰ পৰৱৰ্তী হোম প্ৰডাকচন ছবিৰ বাবে কাম বিচাৰিছে। কিং খানে টুইটাৰ়োগে সদৰী কৰা প’ষ্টতো সম্প্ৰতি সামাজিক মাধ্যমত ভাইৰেল হৈ পৰিছে। উল্লেখ্য যে, ২০১৬ চনত মুক্তি পোৱা ‘ডিয়েৰ জিন্দেগী’ত শ্বাহৰুখ খান আৰু আলিয়া ভাটক একেলগে দেখিবলৈ পোৱা গৈছিল।

শ্বাহৰুখ খানে আলিয়া ভাটৰ টুইটাৰ প’ষ্টত প্ৰতিক্ৰিয়া প্ৰকাশ কৰি কয়, ‘এই প্ৰডাকচনৰ পাছত পৰৱৰ্তী প্ৰডাকচনত অনুগ্ৰহ কৰি মোক সুযোগ দিবা। নিৰ্ধাৰিত সময়ত শ্বুটিং স্থলীলৈ যাম আৰু প্ৰফেচ’নেল হৈ থাকিম।প্ৰতিশ্ৰুতি দিলোঁ।’ ধেমালীৰ চলেৰে আলিয়া ভাটৰ পৰা এইদৰে কাম বিচাৰিছে বাদশ্বাহে। উল্লেখ্য যে, আলিয়া ভাটে প্ৰথমবাৰলৈ প্ৰযোজক হিচাপে কাম কৰিবলৈ আগবাঢ়িিছে। ছবিখনত আলিয়া ভাটৰ সৈতে ছেফালী শ্বাহকো দেখিবলৈ পাৱ চলচিত্ৰ প্ৰেমীয়ে। মাতৃ-কন্যাৰ কাহিনীক কেন্দ্ৰ কৰি নিৰ্মিত ‘ডাৰ্লিং’ত মুম্বাই চহৰৰ নিম্ন মধ্যবৰ্গৰ পৰিৱেশক তুলি ধৰা হ’ব বুলি জানিবলৈ পোৱা গৈছে।আনহাতে শ্বাহৰুখ খান বৰ্তমান ‘পাঠান’ ছবিৰ শ্বুটিং-ত ব্যস্ত হৈ আছে।‘পাঠান’ত শ্বাহৰুখ সৈতে অভিনয় কৰিছে দীপিকা পাডুকনে।