শাৰীৰিক প্ৰত্যাহ্বানক নেওচি ৰাষ্ট্ৰীয় পৰ্যায়ত জিলিকিল মৰাণৰ অমৰ চাওৰা; পাঞ্জা খেলত দুটাকৈ সোণৰ পদক অৰ্জন

ডিজিটেল ডেস্ক: অসমীয়া ক্ৰীড়াক্ষেত্ৰৰ বাবে এক গৌৰৱোজ্জ্বল খবৰ! ৰাষ্ট্ৰীয় পৰ্যায়ত পুনৰবাৰ জিলিকি উঠিল মৰাণৰ এজন প্ৰতিভাৱান খেলুৱৈ। গুজৰাটৰ গান্ধীনগৰত অলপতে অনুষ্ঠিত হৈ যোৱা ‘চতুৰ্থ পাফি নেচনেল আৰ্ম ৰেচলিং এণ্ড পেৰা আৰ্ম ৰেচলিং চেম্পিয়নশ্বিপ-২০২৬’ (4th PAFI National Arm Wrestling & Para Arm Wrestling Championship-2026)ত বিশেষভাৱে সক্ষম পাঞ্জা খেলুৱৈ অমৰ চাওৰাই চমকপ্ৰদ সফলতা অৰ্জন কৰিছে।

প্ৰতিযোগিতাখনত তেওঁ সোঁ আৰু বাওঁ দুয়োখন হাতৰ পাঞ্জা যুঁজতে অৱতীৰ্ণ হৈ দুটাকৈ সোণৰ পদক বুটলি সমগ্ৰ ৰাজ্যখনলৈকে গৌৰৱ কঢ়িয়াই আনিছে।

মৰাণৰ গজপুৰীয়া চাওৰা লাইনৰ বাসিন্দা অমৰ চাওৰাৰ এই সাফল্যই উৎফুল্লিত কৰি তুলিছে সমগ্ৰ ক্ৰীড়াপ্ৰেমীক।

বিগত চাৰি বছৰ ধৰি তেওঁ মৰাণৰ ‘অৰুণোদয় সংঘ’ত নিয়মীয়াকৈ প্ৰশিক্ষণ গ্ৰহণ কৰি আহিছে। বিশিষ্ট প্ৰশিক্ষক পাৰ্থপ্ৰতীম বৰুৱাৰ প্ৰশিক্ষণত পাঞ্জা খেলত উজলি উঠিবলৈ সক্ষম হৈছে অমৰ চাওৰা। 

প্ৰশিক্ষক পাৰ্থপ্ৰতীম বৰুৱাৰ সঠিক নিৰ্দেশনা আৰু কঠোৰ তত্বাৱধানত লাভ কৰা এই ৰাষ্ট্ৰীয় পৰ্যায়ৰ ডাবল গোল্ড মেডেলৰ সফলতাত খেলুৱৈ অমৰ চাওৰা বৰ্তমান অত্যন্ত উৎফুল্লিত আৰু আনন্দিত হৈ পৰিছে। তেওঁৰ এই সফলতাই সমগ্ৰ মৰাণ অঞ্চলৰ ক্ৰীড়াপ্ৰেমীসকলৰ মাজতো ব্যাপক উৎসাহৰ সৃষ্টি কৰিছে।