ডিজিটেল ডেস্কঃ ভাৰতৰ বিৰুদ্ধে আৰম্ভ হ’ল আমেৰিকাৰ ৰাষ্ট্ৰপতি ড’নাল্ড ট্রাম্পৰ এক্সন৷ আমেৰিকাৰ পৰা বাহিৰ কৰা হৈছে অবৈধভাৱে প্ৰৱেশ কৰা ভাৰতীয়ক৷
অবৈধ প্রবাসীৰে ভৰা প্ৰথমখন আমেৰিকাৰ সেনা বিমান C-17 ৰাওনা ভাৰতলৈ৷ ৰাষ্ট্ৰপতি হিচাপে শপতগ্ৰহণ কৰিয়ে ড'নাল্ড ট্রাম্পে হুংকাৰ দিছিল অবৈধ প্রবাসীৰ বিৰুদ্ধে৷
প্রায় ১৮ হাজাৰ প্ৰবাসী ভাৰতীয়ক ঘূৰাই পঠোৱা হ'ব ভাৰতলৈ৷
আমেৰিকাত বসবাস কৰা অবৈধ ভাৰতীয় অনুপ্ৰৱেশকাৰীক লৈ যোৱা প্ৰথমখন বিমান নতুন দিল্লীলৈ ৰাওনা হৈছে। আমেৰিকা প্ৰশাসনৰ বিষয়াসকলে জনোৱা মতে, ভাৰতীয়সকলক চি-১৭ বিমানেৰে উভতাই পঠিওৱা হৈছে। উল্লেখযোগ্য যে নিৰ্বাচনী প্ৰচাৰৰ সময়ত ট্ৰাম্পে আমেৰিকাত অবৈধভাৱে বাস কৰা অনুপ্ৰৱেশকাৰীৰ বিৰুদ্ধে হুংকাৰ দিছিল৷
ইয়াৰ পৰা বুজা যায় যে ড’নাল্ড ট্ৰাম্পৰ প্ৰশাসনে অবৈধ অনুপ্ৰৱেশকাৰীৰ বিৰুদ্ধে ব্যৱস্থা তীব্ৰতৰ কৰি তুলিছে। নিৰ্বাচনী প্ৰচাৰৰ সময়ত ট্ৰাম্পে কৈছিল যে তেওঁ আমেৰিকাৰ ইতিহাসৰ আটাইতকৈ ডাঙৰ গণ বিতাড়ন কৰিব। ট্ৰাম্পৰ প্ৰশাসনে প্ৰথমে মুঠ ১৫ লাখ লোকৰ তালিকা প্ৰস্তুত কৰিছিল আৰু ইয়াৰে ১৮ হাজাৰ ভাৰতীয়।
অনুমান অনুসৰি আমেৰিকাত প্ৰায় ৭.২৫ লাখ অবৈধ ভাৰতীয় অনুপ্ৰৱেশকাৰী বাস কৰে আৰু আচৰিত কথা যে মেক্সিকো আৰু এল ছালভাডৰৰ পিছত এইটোৱেই তৃতীয় সৰ্বাধিক অবৈধ অনুপ্ৰৱেশকাৰী।
যোৱা মাহত ভাৰতে কৈছিল যে আমেৰিকাত অবৈধভাৱে বসবাস কৰা ভাৰতীয় নাগৰিকসকলক দেশলৈ ঘূৰাই অনাৰ বাবে সাজু। বৈদেশিক মন্ত্ৰী এছ. জয়শংকৰে কৈছিল যে ভাৰতে তদন্ত কৰি আছে কোন ভাৰতীয়ক আমেৰিকাৰ পৰা আনিব পাৰি কিন্তু তেওঁলোকৰ সংখ্যা এতিয়াও ক’ব পৰা হোৱা নাই।
জানুৱাৰী মাহত ৰাষ্ট্ৰপতি ড’নাল্ড ট্ৰাম্পে কৈছিল যে প্ৰধানমন্ত্ৰী নৰেন্দ্ৰ মোদীয়ে আমেৰিকাত অবৈধভাৱে বাস কৰা ভাৰতীয় অনুপ্ৰৱেশকাৰীক ঘূৰাই লব লাগিব। দুয়োগৰাকী নেতাৰ মাজত ফোন কলৰ পিছত এই বক্তব্য প্ৰকাশ কৰিছে। ফোনত হোৱা বাৰ্তালাপৰ সময়ত দুয়োজন নেতাই বহু বিষয়ৰ ওপৰত আলোচনা কৰে।
Continue Reading
