চীনে বিশ্বৰ সৰ্ববৃহৎ নদীবান্ধটো নিৰ্মাণ কৰিবলৈ লোৱা সিদ্ধান্তৰ তীব্ৰ বিৰোধিতা সাংসদ দিলীপ শইকীয়াৰ

আনহাতে, ব্রহ্মপুত্র নদীত নির্মাণ হ'বলগীয়া এই বান্ধটো তিব্বতৰ মালভূমিৰ পূব প্ৰান্তত থকা হিমালয়ৰ বিশাল উপত্যকাত নিৰ্মাণ কৰা হ'ব, যিটো অৰুণাচল প্ৰদেশৰ সীমান্তৰ নিচেই ওচৰত আৰু এই অঞ্চলটো ৰিং অব্ ফায়াৰ জ'নত পৰে। এনে পৰিস্থিতিত এই স্থানত ইমান বৃহৎ বান্ধ নিৰ্মাণকাৰ্য পৰিৱেশ আৰু স্থানীয় জনগোষ্ঠীৰ বাবে এক বৃহৎ ভাবুকি। ইফালে বান্ধ নিৰ্মাণ কৰিব লগীয়া অঞ্চলটোত সঘনাই ভূমিকম্প হৈ থাকে বুলি উল্লেখ কৰি শইকীয়াই লগতে কয় যে এনে পৰিস্থিতিত উক্ত বান্ধটো নিৰ্মাণ কৰিলে পৰিৱেশ তন্ত্ৰৰ ওপৰত ভীষণ হেঁচা পৰিব, যাৰ ফলত বহু দুর্ঘটনা সংঘটিত হ'ব পাৰে। উত্তৰ-পূব ভাৰতৰ ৰাজ্যসমূহ আৰু বাংলাদেশ ইতিমধ্যে ভয়াৱহ বানপানীৰ সন্মুখীন হৈ আহিছে। বৃহৎ নদীবান্ধটোৰ ফলত হ'বলগীয়া জলবায়ু পৰিৱৰ্তনৰ বাবে নামনি অঞ্চলৰ ৰাইজ ভূমিস্খলন, ভূমিকম্প আৰু বানপানীৰ দৰে সমস্যাৰ অধিক প্ৰত্যাহ্বানৰ সন্মুখীন হ'ব লাগিব। 

প্রণিধানযোগ্য যে চীনে নির্মাণ কৰিবলগীয়া বান্ধটো সম্পূৰ্ণ হ'লে বিশ্বৰ ভিতৰতে বৃহত্তম নদীবান্ধ হিচাপে পৰিগণিত হ'ব। ২০২৩ চনৰ এক প্রতিবেদন অনুসৰি এই বান্ধটোৰ জৰিয়তে চীনে প্রতিবছৰে ৩০০ বিলিয়ন কিল'ৱাট আৱাৰৰো অধিক বিদ্যুৎ উৎপাদন কৰিবলৈ সক্ষম হ'ব। সাংসদ শইকীয়াই স্পষ্টভাৱে কয় যে চীনে প্রায় ১৩৭ বিলিয়ন ডলাৰ ব্যয় কৰি এই বান্ধটো নির্মাণ কৰিবলৈ ওলাইছে। এই বান্ধৰ জৰিয়তে বৃহৎ পৰিমাণৰ পানী জমা কৰিব পৰা যাব। অৱধাৰিতভাৱেই নদীবান্ধ নিৰ্মাণৰ পাছত নদীখনৰ সোঁতৰ ওপৰত চীনৰ নিয়ন্ত্ৰণ থাকিব। ইয়াৰ ফলত ভৱিষ্যতে উত্তৰ-পূব ভাৰতত পানীৰ অভাৱ বা বানপানীৰ সংকটে সদায় দেখা দিব। ইয়াৰ সমানে সমানে অৰুণাচল প্ৰদেশৰ সীমান্তত চীনৰ প্ৰভাৱো বৃদ্ধি পাব। অসম তথা উত্তৰ-পূৰ্বাঞ্চললৈ ভাবুকি কঢ়িয়াই অনা এই বিষয়টো চীনৰ সৈতে দ্বিপাক্ষিক আলোচনা কৰিবলৈ দাবী জনাই শইকীয়াই অসম তথা উত্তৰ-পূবৰ ভৱিষ্যৎ সুৰক্ষিত কৰাৰ স্বাৰ্থত এতিয়াই প্রয়োজনীয় পদক্ষেপ গ্রহণ কৰিবলৈ কেন্দ্ৰীয় চৰকাৰক আহ্বান জনায়।