আশাৰ খবৰ : ক’ভিডত মৃত্যু ৰোধৰ মন্ত্ৰ বিচাৰি পাইছে গৱেষকে

নতুন দিল্লী : দেশৰ ক’ভিড পৰিস্থিতি এতিয়াও সম্পূৰ্ণৰূপে নিয়ন্ত্ৰণলৈ অহা নাই। তাৰ মাজতে তৃতীয় লহৰৰ আশংকাও প্ৰকাশ কৰি আহিছে বিশেষজ্ঞসকলে। কিন্তু তাৰ মাজতে ক’ভিডত হ’বপৰা মৃত্যু ৰোধ কৰাৰ মন্ত্ৰ বিচাৰি পাইছে গৱেষকে। দেশত চলিছে বিশ্বৰ ভিতৰতে সৰ্ববৃহত টিকাকৰণ অভিযান। এই অভিযান চলি থকাৰ মাজতে ক’ভিড প্ৰতিষেধকৰ সাফল্য সম্পৰ্কত এক নতুন তথ্য প্ৰকাশ কৰিছে গৱেষকসকলে।

শেহতীয়া এই তথ্যই দিছে আশাৰ বতৰা। এই তথ্য অনুসৰি এপালি ক’ভিড প্ৰতিষেধকেই ৯৬.৬শতাংশ ক’ভিড প্ৰতিৰোধৰ বাবে সক্ষম। আনহাতে দুপালি ক’ভিড প্ৰতিষেধক লোৱাৰ পাছত ই ৯৭.৫শতাংশ প্ৰভাৱশালী হৈ পৰে। কেন্দ্ৰীয় চৰকাৰে বিগত এপ্ৰিল মাহৰ পৰা আগষ্ট মাহৰ ভিতৰত তথ্যৰ আধাৰত এই কথা প্ৰকাশ কৰিছে। চৰকাৰী সূত্ৰই লগতে প্ৰকাশ কৰিছে যে, ক’ভিডৰ সৰ্বনাশী দ্বিতীয় ঢৌত মৃত্যু হোৱা সৰহহসংখ্যক লোকেই আছিল প্ৰতিষেধক গ্ৰহণ নকৰা লোক। চৰকাৰৰ ক’ভিড টাস্ক ফ’ৰ্চৰ মুৰব্বী ভি কে পলে প্ৰকাশ কৰে ‘এই ভাইৰাছক প্ৰতিহত কৰাৰ বাবে টিকাকৰণ হৈছে অতি গুৰুত্বপূৰ্ণ সুৰক্ষা।

দেশত এতিয়া ভেকচিন সুলভ হৈছে আৰু আমি সকলোকে প্ৰতিষেধক গ্ৰহণ কৰাৰ বাবে অনুৰোধ জনাইছোঁ। ই এই মহামাৰীৰ বিৰুদ্ধে মৃত্যুক প্ৰতিহত কৰাত আমাক সহায় কৰিব।’ কেন্দ্ৰীয় চৰকাৰে লগতে প্ৰকাশ কৰিছে যে, ব্ৰেকথ্ৰু সংক্ৰমণ বা সম্পূৰ্ণৰূপে টিকাকৰণ কৰা লোকো যে সংক্ৰমিত নহ’ব তেনে কোনো কথা নাই। কিন্তু ইয়াৰ ফলত মৃত্যু হোৱা পৰ্যায় নাপায় আৰু হাস্পতালত ভৰ্তি হ’বলগীয়া পৰিস্থিতিৰ সৃষ্টি হোৱাৰ হাৰো অতি কম হয়। টিকাকৰণ অভিযানক লৈ বিভিন্ন বিতৰ্ক তথা আলোচনা-সমালোচনা চলি থকাৰ মাজতে কেন্দ্ৰৰ এই তথ্য আশাপ্ৰদ বিবেচিত হৈছে।