ভাৰতৰ শ্ৰেষ্ঠ শিক্ষা প্ৰতিষ্ঠান, চাওক সদ্যপ্ৰকাশিত তালিকা

নতুন দিল্লী : দেশৰ সৰ্বশ্ৰেষ্ঠ কাৰিকৰী আৰু চিকিৎসা শিক্ষাৰ প্ৰতিষ্ঠানৰ শীৰ্ষ দহখনৰ তালিকা প্ৰকাশ কৰিছে কেন্দ্ৰীয় চৰকাৰে। প্ৰত্যাশিতভাৱে এই তালিকাৰ শীৰ্ষত আছে এইমছ আৰু আইআইটি। কেন্দ্ৰীয় শিক্ষা মন্ত্ৰী ধৰ্মেন্দ্ৰ প্ৰধানে প্ৰকাশ কৰা ৰাষ্ট্ৰীয় মেডিকেল কলেজৰ প্ৰতিষ্ঠানিক ৰেংকিং ২০২১ত দিল্লীৰ এইমছে দেশৰ ভিতৰতে শীৰ্ষ স্থান দখল কৰিছে।

এইমছৰ পাছত তালিকাত চণ্ডীগড়ৰ পি জি আই এম ই আৰ, ভেলোৰ খ্ৰীষ্ট্ৰিয়ান মেডিকেল কলেজ আৰু বেংগালুৰৰ মেণ্টেল হেল্থ আৰু নিউৰ' ছাইন্সে দ্বিতীয়, তৃতীয় আৰু চতুৰ্থ স্থান লাভ কৰিছে। উল্লেখ্য যে, দিল্লীৰ এইমছে যোৱা বছৰো তালিকাৰ শীৰ্ষ স্থান দখল কৰিবলৈ সক্ষম হৈছিল। ইফালে, কাৰিকৰী প্ৰতিষ্ঠানৰ ক্ষেত্ৰত শীৰ্ষ দহটা স্থানৰ সাতখন আইআইটি প্ৰতিষ্ঠানে স্থান লাভ কৰিবৰ বাবে সক্ষম হয়।

ইণ্ডিয়ান ইনষ্টিটিউট অৱ টেকন'লজী মাদ্ৰাজ (আই আই টি মাদ্ৰাজ) ভাৰতৰ শ্ৰেষ্ঠ কাৰিকৰী প্ৰতিষ্ঠান হিচাপে বিবেচিত হৈছে। শীৰ্ষ ১৫খন কাৰিকৰী শিক্ষা প্ৰতিষ্ঠানৰ তালিকাত স্থান লাভ কৰিছে আইআইটি গুৱাহাটীয়েও। শীৰ্ষ পোন্ধৰখন সামগ্ৰিকভাৱে শ্ৰেষ্ঠ শিক্ষা প্ৰতিষ্ঠানৰ তালিকাত দিল্লীৰ জৱাহৰলাল নেহৰু বিশ্ববিদ্যালয়, জামিয়া মিলিয়া ইছলামিয়া, বেনাৰস হিন্দু বিশ্ববিদ্যালয়, যাদৱপুৰ বিশ্ববিদ্যালয় মণিপাল একাডেমী অব হায়াৰ এডুকেচন আদিও আছে।