ডিজিটেল ডেস্ক: বিধ্বস্ত গাজাত আকৌ এবাৰ ইজৰাইলে চলাইছে নৰসংহাৰ। অমানৱীয় আচৰণেৰে ভোকাতুৰ পেলেষ্টাইনীৰ ওপৰত প্ৰাণঘাটী আক্ৰমণ চলাইছে ইজৰাইলী সৈনিকে৷
বৃহস্পতিবাৰে গাজাত ইজৰাইলী সেনাৰ নিৰ্বিচাৰ গুলীচালনাত প্ৰাণ হেৰুৱালে ১১২জন নিৰপৰাধী পেলেষ্টাইনী লোকে। এই নাৰকীয় ঘটনা সংঘটিত হৈছে গাজাৰ অল নাবুলচি চহৰত। ইজৰাইলী সেনাৰ আক্ৰমণত আহত হ’ল ৭৬০ গৰাকী লোক।
দৰাচলতে, বৃহস্পতিবাৰে খাদ্য সামগ্ৰীভৰ্তি ট্ৰাকৰ পৰা সামগ্ৰী আনিবলৈ গৈছিল পেলেষ্টাইনী লোকসকল। সাহায্য সামগ্ৰী কঢ়িয়াই নিয়া ট্ৰাকখনৰ সমীপতে আছিল সেনাবাহিনীৰ টেংক আৰু ইজৰাইলী সৈনিক। ঘটনাৰ পাছত ইজৰাইলী সৈনিকৰ অভিযোগ– খাদ্য সামগ্ৰী সংগ্ৰহৰ বাবে যোৱা লোকসকলে চলাইছিল লুটপাতৰ অপচেষ্টা। উগ্ৰ হৈ পৰা ভোকাতুৰ পেলেষ্টাইনীৰ দলটোৱে ইজৰাইলী সৈনিকসকলক ঘেৰি ধৰিছিল বুলি অভিযোগ ইজৰাইলৰ। তেনে পৰিস্থিতিত নিৰ্বিচাৰ গুলীচালনা কৰিবলৈ বাধ্য হৈছিল সৈনিকসকল। পাছত খাদ্য সামগ্ৰী কঢ়িয়াই অনা ট্ৰাকখনতে প্ৰেৰণ কৰা হৈছিল মৃতদেহসমূহ।
২০২৩ৰ ৭ অক্টোবৰত সূত্ৰপাত ঘটা ইজৰাইল–হামাছ সংঘৰ্ষৰ মাজতে ইজৰাইলে পুনৰবাৰ সংঘটিত কৰিলে অমানৱীয় কাণ্ড। ইতিমধ্যে ইজৰাইলৰ আক্ৰমণত গাজা ধ্বংস হৈছিল ২৪খন চিকিৎসালয়ৰ লগতে ১২৩খন এম্বুলেঞ্চ। যুদ্ধত এতিয়ালৈ প্ৰাণ হেৰুৱাইছে ৩০ হাজাৰৰো অধিক পেলেষ্টাইনী। ধ্বংসস্তূপত পৰিণত গাজাত এতিয়া ২২ লাখ লোক দুৰ্ভিক্ষৰ গৰাহত। আৰু তেনে এদল ভোকাতুৰ পেলেষ্টাইনীৰ ওপৰতে এনেদৰে বীৰত্ব প্ৰদৰ্শন কৰিলে ইজৰাইলী সৈনিকে।
Continue Reading
