ডিজটেল ডেস্কঃ ছিৰিয়াত বিগত ১১ দিন ধৰি বিদ্ৰোহী সংগঠন আৰু সেনাৰ মাজত চলি থকা সংঘাতৰ মাজতে ৰাজধানী ডামাস্কাছত প্ৰৱেশ কৰিছে বিদ্ৰোহী যোদ্ধাসকলে। এক প্ৰতিবেদন অনুসৰি যোৱা এসপ্তাহত বিদ্ৰোহীয়ে ছিৰিয়াৰ চাৰিখন ডাঙৰ চহৰ দখল কৰিছে। ইয়াৰ ভিতৰত আছে আলেপ্পো, হামা, হোমছ আৰু দাৰা চহৰ।
ৰাজধানী ডামাস্কাছ এৰি ৰাষ্ট্ৰপতি বাছাৰ আল আছাদৰ পলায়নৰ খবৰ পোহৰলৈ আহিছে । বহু সংবাদ মাধ্যমৰ বাতৰিয়ে দাবী কৰিছে যে বিদ্ৰোহীৰ ভয়ত আছাদ আৰু তেওঁৰ পৰিয়ালে দেশ এৰি ৰাছিয়াত আশ্ৰয় লৈছে। অৱশ্যে ছিৰিয়া চৰকাৰে আছাদে দেশৰ পৰা পলায়ন কৰাৰ খবৰ অস্বীকাৰ কৰিছে। এই সংঘাতৰ বাবে এতিয়ালৈকে ৩.৭০ লাখ লোক স্থানচ্যুত হৈছে।
৬ ডিচেম্বৰত দখল কৰা দাৰা চহৰৰ পৰা ৰাজধানী ডামাস্কাছত প্ৰৱেশ কৰিছে বিদ্ৰোহী যোদ্ধাসকলে। ২০১১ চনত ৰাষ্ট্ৰপতি বাছাৰ আল আছাদৰ বিৰুদ্ধে বিদ্ৰোহ আৰম্ভ হোৱা সেই একেখন চহৰৰ পৰাই সমগ্ৰ দেশ যুদ্ধৰ অৱস্থালৈ পৰিণত হৈছিল দাৰা। দৰাৰ পৰা ৰাজধানী ডামাস্কাছলৈ দূৰত্ব প্ৰায় ১০০ কিলোমিটাৰ। স্থানীয় বিদ্ৰোহীয়ে ইয়াত বন্দী কৰিছে। একে সময়তে আলেপ্পো, হামা আৰু হোমছ ইছলামিক উগ্ৰপন্থী সংগঠন হায়াত তাহৰিৰ আল শ্বামৰ নিয়ন্ত্ৰণত আছে।
২৭ নৱেম্বৰত ছিৰিয়াত সেনা আৰু ছিৰিয়াৰ বিদ্ৰোহী সংগঠন হায়াত তাহৰিৰ আল শ্বাম (HTS)ৰ মাজত সংঘাত আৰম্ভ হৈছিল। ইয়াৰ পিছত ১ ডিচেম্বৰত বিদ্ৰোহীয়ে উত্তৰ দিশৰ আলেপ্পো চহৰ দখল কৰে। চাৰিদিন পিছত বিদ্ৰোহী সংগঠনে আন এখন ডাঙৰ চহৰ হামাকো দখল কৰে ৷ দক্ষিণৰ দাৰা চহৰ দখল কৰি দুই দিশৰ পৰা ৰাজধানী দামাস্কাছক ঘেৰাও কৰিছে বিদ্ৰোহীয়ে। দাৰা আৰু ৰাজধানী দামাস্কাছৰ মাজত মাত্ৰ ৯০ কিলোমিটাৰ দূৰত্ব। ইফালে ইৰাণে ছিৰিয়াৰ পৰা নিজৰ জনসাধাৰণক উলিয়াই আনিবলৈ আৰম্ভ কৰিছে। ভাৰতীয় বৈদেশিক পৰিক্ৰমা মন্ত্ৰালয়ে শুকুৰবাৰে গভীৰ নিশা ছিৰিয়ালৈ যোৱা আৰু তাত বাস কৰা ভাৰতীয় মূলৰ লোকসকলৰ বাবে নিৰ্দেশনা জাৰি কৰে।
Continue Reading
