ডিজিটেল ডেস্কঃদিনটো আছিল ২০১৭ চনৰ ২৫ জুলাই। উক্ত দিনটোতে দেশৰ তদানীন্তন মুখ্য ন্যায়াধীশ জগদীশ সিং খেহাৰে ৰাম নাথ কোবিন্দক ভাৰতৰ চতুৰ্দশ সংখ্যক ৰাষ্ট্ৰপতি হিচাবে শপত গ্ৰহণ কৰোৱাইছিল। সেই দিনটোৰ পিছৰে পৰাই কোবিন্দে দেশক বহু দুৰ্যোগপূৰ্ণ মুহূৰ্তত নেতৃত্ব দি আহিছে। বিশেষকৈ কোভিডৰ জটিল সময়ছোৱাত ৰাষ্ট্ৰপতি হিচাবে কোবিন্দে দেশবাসীক দিব পাৰিছিল জীয়াই থকাৰ সাহস। অৱশেষত কোবিন্দৰ কাৰ্যকালৰ অন্তিম মুহূৰ্ত উপনীত হৈছে।
কাইলৈ আনুষ্ঠানিকভাবে তেওঁ দেশৰ সৰ্বোচ্চ পদবীৰ পৰা অৱসৰ গ্ৰহণ কৰিব।অৱসৰ গ্ৰহণৰ পূৰ্বে কোবিন্দে আজি এক ভাবগধুৰ তথা সাৰগৰ্ভ ভাষণেৰে সকলোৰে হৃদয় জয় কৰিবলৈ সক্ষম হয়।
ৰাষ্ট্ৰপতি কোবিন্দে শনিবাৰে দেশশৰ ৰাজনৈতিক দলসমূহক ৰাষ্ট্ৰীয় স্বাৰ্থতে দলীয় ৰাজনীতিৰ উৰ্ধলৈ গৈ জনতাৰ কল্যাণৰ হকে আত্মনিয়োগ কৰিবলৈ আহ্বান জনায়।
সংসদৰ কেন্দ্ৰীয় হলত লোকসভা আৰু ৰাজ্যসভাৰ সাংসদসকলক উদ্দেশ্যি দিয়া বিদায় ভাষণত কোবিন্দে কয় যে তেওঁ সদায় নিজকে বৃহত্তৰ পৰিয়ালৰ অংশ বুলি গণ্য কৰে, য'ত সংসদৰ সদস্যসকল অন্তৰ্ভুক্ত আছিল। কোবিন্দে কয় যে তেওঁলোকে কোবিন্দৰ হৃদয়ত এক বিশেষ স্থান দখল কৰি আছে। বিদায়ী ৰাষ্ট্ৰপতিগৰাকীয়ে কয়, "যিকোনো পৰিয়ালৰ দৰে কেতিয়াবা তেওঁলোকৰ মাজত পাৰ্থক্য থাকিব পাৰে, কিন্তু তেওঁলোকে দেশৰ বৃহত্তৰ স্বাৰ্থৰ বাবে একেলগে কাম কৰা উচিত।" শান্তি আৰু সম্প্ৰীতিৰ মূল্যৰ বিষয়ত গুৰুত্ব আৰোপ কৰি কোবিন্দে কয় যে সাংসদসকলে গান্ধীবাদী দৰ্শন অনুসৰণ কৰা উচিত। সংসদত বিতৰ্ক আৰু ভিন্নমতৰ অধিকাৰ থকা বুলিও তেওঁ কয়।
ৰাষ্ট্ৰপতি কোবিন্দে কয় যে কোভিড-১৯ মহামাৰীৰ মোকাবিলাৰ বাবে ভাৰতৰ প্ৰচেষ্টাক সমগ্ৰ বিশ্বই প্ৰশংসা কৰিছে। "কোভিড মহামাৰীৰ বাবে বিশ্বই সংগ্ৰাম কৰি আছে। মই আশা কৰোঁ যে আমি মহামাৰীৰ পৰা শিক্ষা লওঁ, আমি পাহৰি যাব নালাগিব যে আমি সকলোৱে প্ৰকৃতিৰ অংশ। কঠিন সময়ত, সমগ্ৰ বিশ্বতে ভাৰতৰ প্ৰচেষ্টাক প্ৰশংসা কৰা হৈছিল," -কোবিন্দে কয়। উল্লেখ্য ৰাষ্ট্ৰপতি ৰামনাথ কোবিন্দৰ কাৰ্যকাল দেওবাৰে শেষ হ'ব। তেওঁৰ উত্তৰাধিকাৰী দ্ৰৌপদী মুৰ্মুকো কোবিন্দে আজি পুনৰ অভিনন্দন জনায়। মুৰ্মুৱে ভাৰতৰ ১৫ সংখ্যক ৰাষ্ট্ৰপতি হিচাপে শপত ল'ব। তেওঁ হৈছে দেশৰ শীৰ্ষ সাংবিধানিক পদত অধিষ্ঠিত হোৱা প্ৰথম জনজাতীয় মহিলা।
কোবিন্দে লগতে কয়, "মোক ৰাষ্ট্ৰপতি হিচাপে সেৱা আগবঢ়োৱাৰ সুযোগ দিয়াৰ বাবে মই দেশৰ নাগৰিকসকলৰ প্ৰতি সদায় কৃতজ্ঞ হৈ থাকিম।" ৰাষ্ট্ৰপতি কোবিন্দৰ বিদায় অনুষ্ঠানত উপস্থিত থকা নেতাসকলৰ ভিতৰত উপৰাষ্ট্ৰপতি এম ভেংকায়া নাইডু, প্ৰধানমন্ত্ৰী নৰেন্দ্ৰ মোদী আৰু লোকসভাৰ অধ্যক্ষ ওম বিৰলা আদি অন্যতম আছিল। ইয়াৰ পূৰ্বে শুকুৰবাৰে নিশা প্ৰধানমন্ত্ৰী মোদীয়ে কোবিন্দৰ সন্মানাৰ্থে নৈশ ভোজৰ আয়োজন কৰিছিল।
নৱ নিৰ্বাচিত ৰাষ্ট্ৰপতি দ্ৰৌপাদি মুৰ্মু, কেন্দ্ৰীয় মন্ত্ৰী পৰিষদৰ সদস্য, বিভিন্ন ৰাজ্যৰ মুখ্যমন্ত্ৰী, বহুতো পদ্ম বঁটা বিজয়ীকে ধৰি অন্যান্য গণ্যমান্য ব্যক্তিৰ লগতে জনজাতীয় নেতাসকলে উক্ত নৈশ ভোজত অংশগ্ৰহণ কৰিছিল। কোবিন্দে তেওঁৰ কাৰ্যকালতে দেশৰ কেইবাগৰাকীও শীৰ্ষ পদাধিকাৰীক নিযুক্তি প্ৰদানৰ লগতে বিশ্বৰ আন বহু দেশৰ সৈতে ভাৰতৰ সম্পৰ্ক অধিক মধুৰ কৰি তোলাত সফলকাম হৈছিল।
Continue Reading
