দৰিদ্ৰ জনগণক উদ্দেশ্যি বিশেষ আঁচনি মুকলি কৰিলে মুখ্যমন্ত্ৰীয়ে

ভূৱনেশ্বৰ : ৰাজ্যৰ খাদ্য সুৰক্ষা ব্যৱস্থা অধিক শক্তিশালী কৰাৰ বাবে ওড়িশাৰ মুখ্যমন্ত্ৰী নবীন পাটনায়কে আজি ৰাজ্যখনত আৰম্ভ কৰে ‘ৱান নেচন ৱান ৰেচনকাৰ্ড’ কাৰ্যসূচী। এই কাৰ্যসূচীৰ জৰিয়তে ৰাষ্ট্ৰীয় খাদ্য সুৰক্ষা আইনৰ আঁওতালৈ অহা অন্য ৰাজ্যৰ হিতাধিকাৰীয়েও ওড়িশাৰ পৰা ৰেচন লাভ কৰিব পাৰিব। ৰাজ্যখনৰ ১০,৫৭৮খন সুলভ মূল্যৰ দোকানৰ জৰিয়তে এই ৰেচন লাভ কৰিব পাৰিব হিতাধিকাৰীয়ে।

এই কাৰ্যসূচী মুকলি কৰা অনুষ্ঠানত ভাষণ দি মুখ্যমন্ত্ৰী পাটনায়কে কয়, ‘মৰ্যাদা সহকাৰে জীয়াই থকাৰ অধিকাৰ সকলোৰে আছে আৰু দৰিদ্ৰ জনগণক এই অধিকাৰৰ পৰা কোনেও বঞ্চিত কৰিব নোৱাৰে। ৰাজ্য চৰকাৰে বিভিন্ন আঁচনিৰ জৰিয়তে তেওঁলোকৰ অধিকাৰ সুৰক্ষিত কৰিবলৈ চেষ্টা কৰি আহিছে আৰু দৰিদ্ৰ জনগণৰ কল্যাণৰ বাবে আগলৈও কাম কৰি যাব।’

মুখ্যমন্ত্ৰী পাটনায়কে ৰাজহুৱা বিতৰণ ব্যৱস্থাৰ অধীনত আন এখন আঁচনিৰো শুভাৰম্ভ কৰে। মালকাংগিৰি জিলাক মু্খ্য কৰি এই আঁচনিৰ শুভাৰম্ভ কৰে পাটনায়কে। এই আঁচনিৰ অধীনত মালকাংগিৰি জিলাৰ ৰাজহুৱা বিতৰণ ব্যৱস্থাৰ আঁওতালৈ অহা ৫.৪০লাখ হিতাধিকাৰীক প্ৰতিমাহে ৩,২০০ মেট্ৰিকটন ভিটামিনযু্ক্ত চাউলৰ যোগান ধৰা হ’ব।