ডিজিটেল ডেস্কঃ কেন্দ্ৰীয় খাদ্য মন্ত্ৰালয়ে দিয়া এই তথ্যই স্তম্ভিত কৰি তুলিছে ভাৰতীয় জনসাধাৰনক ৷শেহতীয়াকৈ পৰীক্ষণ প্ৰক্ৰিয়াৰ অধীনত সমগ্ৰ দেশতে ৫.৮ কোটি ৰেচন কাৰ্ড ভুৱা বুলি ধৰা পৰিছে। ৰেচন কাৰ্ডসমূহ পৰীক্ষা কৰিবলৈ কেৱল আধাৰ কাৰ্ডৰ সৈতে মিলাই দিয়াই নহয়, কে ৱাই চি অৰ্থাৎ গ্ৰাহক চিনাক্তকৰণৰ প্ৰক্ৰিয়াও অনুসৰণ কৰা হৈছিল। এইটো সঁচা যে আমাৰ দেশত ৰেচন কাৰ্ডধাৰীৰ সংখ্যা অতি বেছি আৰু ইয়াৰ পৰা বুজিব পাৰি যে ৰাজহুৱা বিতৰণ ব্যৱস্থা অৰ্থাৎ পিডিএছৰ অধীনত ৮০ কোটি লোকক বিনামূলীয়া ৰেচন দিয়া হয়, তথাপিও ৫.৮ কোটি ৰেচন কাৰ্ড ভুৱা বুলি ধৰা পৰে ৷
কেন্দ্ৰীয় খাদ্য মন্ত্ৰালয়ে বুধবাৰে কয় যে চৰকাৰৰ বৃহৎ পৰিসৰৰ ডিজিটেলাইজেশ্যনৰ প্ৰচেষ্টাই দেশৰ ৰাজহুৱা বিতৰণ ব্যৱস্থা (পিডিএছ)ত যথেষ্ট পৰিৱৰ্তন আনিছে আৰু ৫.৮ কোটি ভুৱা ৰেচন কাৰ্ড বাতিল কৰা হৈছে। ইয়াৰ ফলত বিশ্বজুৰি খাদ্য সুৰক্ষা কাৰ্যসূচীৰ বাবে নতুন মানদণ্ড নিৰ্ধাৰণ কৰা হৈছে। মন্ত্ৰালয়ে এক বিবৃতিত কয় যে ৮০.৬ কোটি হিতাধিকাৰীক সেৱা আগবঢ়োৱা পিডিএছ ব্যৱস্থাৰ সংস্কাৰৰ অংশ হিচাপে আধাৰ আৰু ইলেক্ট্ৰনিক ৰূপে গ্ৰাহকৰ (ই-কেৱাইচি)পৰীক্ষণৰ জৰিয়তে ৫.৮ কোটি ভুৱা ৰেচন কাৰ্ড আঁতৰোৱা হৈছে।
মন্ত্ৰালয়ৰ তথ্য অনুসৰি প্ৰায় ২০.৪ কোটি ৰেচন কাৰ্ড ডিজিটেলাইজ কৰা হৈছে।বিবৃতি অনুসৰি সমগ্ৰ দেশৰ সুলভ মূল্যৰ দোকানত ৫.৩৩ লাখ ই-পিঅ’এছ (ইলেক্ট্ৰনিক পইণ্ট অৱ চেল) ডিভাইচ স্থাপন কৰা হৈছে। ইয়াৰ জৰিয়তে খাদ্য বিতৰণৰ সময়ত আধাৰৰ জৰিয়তে পৰীক্ষণৰ লগতে সঠিক ব্যক্তিক ৰেচন বিতৰণ কৰাটো নিশ্চিত কৰা হৈছে।
মন্ত্ৰালয়ে কয়, ‘আজি মুঠ খাদ্য প্ৰায় ৯৮ শতাংশ আধাৰ পৰীক্ষণৰ জৰিয়তে বিতৰণ কৰা হৈছে। ইয়াৰ দ্বাৰা অযোগ্য হিতাধিকাৰী চিনাক্তকৰণ আৰু ক’লা বিপণনৰ আশংকা হ্ৰাস কৰাত সহায় হৈছে।” ইতিমধ্যে মুঠ পিডিএছ হিতাধিকাৰীৰ ৬৪ শতাংশ চৰকাৰৰ ই-কেৱাইচি পদক্ষেপৰ জৰিয়তে পৰীক্ষা কৰা হৈছে। বাকী হিতাধিকাৰীসকলৰ বাবে সমগ্ৰ দেশৰ ৰেচনৰ দোকানত এই প্ৰক্ৰিয়া চলি আছে। যোগানৰ দিশত মন্ত্ৰালয়ে কয় যে ভাৰতীয় খাদ্য নিগমে খাদ্য যোগানৰ বাস্তৱ সময়ত নিৰীক্ষণৰ বাবে ৰে’লৱেৰ সৈতে সংহত বাহন অনুসৰণ ব্যৱস্থাকে ধৰি খাদ্য শস্য সঠিক স্থানলৈ যোগান ধৰাটো নিশ্চিত কৰিবলৈ যোগানৰ ব্যৱস্থাপনা ৰূপায়ণ কৰিছে।
‘ৱান নেচন ৱান ৰেচন কাৰ্ড’ আঁচনিয়ে সমগ্ৰ দেশতে ৰেচন কাৰ্ডৰ বহনযোগ্যতা সম্ভৱ কৰি তুলিছে। ইয়াৰ ফলত হিতাধিকাৰীসকলে বৰ্তমানৰ কাৰ্ড ব্যৱহাৰ কৰি দেশৰ যিকোনো ঠাইতে ৰেচন লাভ কৰাৰ সুবিধা লাভ কৰিছে।মন্ত্ৰালয়ে কয়, ‘চৰকাৰে ডিজিটেলাইজেচন, হিতাধিকাৰীৰ সঠিক চিনাক্তকৰণ আৰু যোগান শৃংখলত উদ্ভাৱনৰ জৰিয়তে খাদ্য সুৰক্ষাৰ পদক্ষেপৰ বাবে এক বিশ্বব্যাপী মাপকাঠী নিৰ্ধাৰণ কৰিছে। ডিজিটেল ৰূপান্তৰত ক্ৰয়ৰ পৰা বিতৰণলৈকে সমগ্ৰ পিডিএছ ব্যৱস্থাটো অন্তৰ্ভুক্ত কৰা হৈছে। ইয়াৰ ফলত প্ৰকৃত হিতাধিকাৰীক বিতৰণ নিশ্চিত কৰাৰ লগতে ব্যৱস্থাটোত ভুৱা কাৰ্ড আৰু ভুল প্ৰৱেশ নাইকিয়া হৈছে।
