ডিজিটেল ডেস্কঃ এটাতকৈ বেছি মূৰ থকা সাপৰ কথা পৌৰাণিক উপাখ্যান আদিত পোৱা যায় যদিও বাস্তৱ পৃথিৱীত এনে সাপ খুব কমেইহে দেখা যায়৷ শেহতীয়াকৈ দক্ষিণ আফ্ৰিকাত উদ্ধাৰ হৈছে এডাল দুমূৰীয়া সাপ৷ সাপডাল উদ্ধাৰ কৰা নিক ইভান্সে দুমূৰীয়া চাউদাৰ্ণ ব্ৰাউন এগ-ইটাৰৰ ফটো ফেচবুকত শ্বেয়াৰ কৰাৰ পিছতে ইণ্টাৰনেটত আলোড়ণৰ সৃষ্টি হোৱা পৰিলক্ষিত হৈছে৷
নিক ইভান্সৰ মতে দুমূৰীয়া সাপ বিধ এটা ক্ষতিহীন প্ৰজাতি। ইভান্সে জনোৱা মতে এজন মানুহৰ ঘৰৰ বাগিচাৰ পৰা তেওঁ এই বিশেষ সাপডাল উদ্ধাৰ কৰিবলৈ সক্ষম হৈছে৷ ডাৰবানৰ এনডৱেডৱে চহৰত বাস কৰা লোক জনে দুমূৰীয়া সাপডাল দেখাৰ পিছতে নিক ইভান্সক খবৰ দিছিল৷
উদ্ধাৰ কৰাৰ পিছত সাপডাল ডাঙৰ বটল এটাত ৰখা হৈছিল৷ ইভান্সে ফেচবুকত এইবুলি লিখিছে, "এই বিকৃত সাপটো দেখি ইমান আচৰিত হৈছিলো, ইয়াৰ , দৈৰ্ঘ্যৰ এক ফুটমান হ’ব৷ সাপডালৰ মূৰবোৰে কেতিয়াবা ইটোৱে সিটোৰ পৰা পৰা বিপৰীত দিশত যাবলৈ চেষ্টা কৰিছে,কেতিয়াবা আকৌ এটা মূৰে আনটোৰ ওপৰত উঠিবলৈ চেষ্টা কৰিছে৷।"
ইভান্সে লগতে কয় যে সৰীসৃপটো জীয়াই যদিও ইয়াক হাবিত এৰি দিয়াৰ কোনো অৰ্থ নাই। তেওঁ কয়" যিমান দূৰ মই অৱগত, এনে দুমূৰীয়া সাপ সাধাৰণতে বেছি দিন জীয়াই নাথাকে। বনাঞ্চলত এৰি দিলেও এনে সাপে বেছি দিন জীয়াই থাকিব নোৱাৰিব। "
ইভান্সৰ পোষ্টটো ইণ্টাৰনেটত ভাইৰেল হৈ পৰিছে। এজন ইণ্টাৰনেট ব্যৱহাৰকাৰীয়ে লিখিছে, "দুৰ্বল বস্তু। তথাপি কৃতজ্ঞ যে ই সুৰক্ষিত।"
আন এজনে লিখিছে "কি আচৰিত সৰু প্ৰাণী! ইমান আশ্চৰ্যজনক যে এনডৱেডৱেৰ মানুহজনে আপোনাৰ সৈতে যোগাযোগ কৰিছিল। আশা কৰোঁ আপুনি সৰু প্ৰাণীবিধক খোৱাত সহায় কৰিব পাৰিব," ।
আন এগৰাকী নেটিজেনে লিখিছে "আশ্চৰ্যজনক ফটো। বৰ দুখজনক কিন্তু চাবলৈ বহুত আকৰ্ষণীয়। "
নিউজ উইকৰ মতে, দুই বা ততোধিক মূৰৰ সৈতে জন্ম হোৱা প্ৰাণীবোৰৰ পলিচেফেলী নামৰ এক অৱস্থাৰ সন্মুখীন হয়৷ এনে ঘটনা স্তন্যপায়ী প্ৰাণীতকৈ সৰীসৃপৰ ক্ষেত্ৰত অধিক হোৱা দেখা যায়৷ এই অৱস্থাত জন্তুবোৰ প্ৰায়ে বেছি দিন জীয়াই নাথাকে।
Continue Reading
