ডিজিটেল ডেস্কঃ নৱবিবাহিত জোঁৱাইক এচিডেৰে আক্ৰমণ কৰিলে শহুৰেকে। এক সৰু বিবাদক লৈ এই ভয়ংকৰ আক্ৰমণ শহুৰেকৰ। মহাৰাষ্ট্ৰৰ কল্যাণৰ পৰা পোহৰলৈ আহিছে এই চাঞ্চল্যকৰ ঘটনা। শহুৰেকৰ এচিড আক্ৰমণত জোঁৱাই গুৰুতৰভাৱে আহত হয়। কল্যাণৰ এখন ব্যক্তিগত চিকিৎসালয়ত চিকিৎসাধীন হৈ আছে জোঁৱাই। আনহাতে শহুৰেক বৰ্তমান পলাতক অৱস্থাত। এই গোচৰত বজাৰপথ আৰক্ষীয়ে ঘটনাস্থলীত উপস্থিত হৈ বিষয়টোৰ তদন্ত আৰম্ভ কৰিছে।
লাভ কৰা তথ্য অনুসৰি ইবাদ ফালকে পৰিয়ালৰ সৈতে কল্যাণ পশ্চিম অঞ্চলত থাকে। এমাহ পূৰ্বে একেটা অঞ্চলতে বাস কৰা জাকি খোটালৰ কন্যাৰ সৈতে ইবাদৰ বিয়া হৈছিল। বিয়াৰ পিছত ইবাদে নৱবিবাহিতা পত্নীৰ সৈতে হনীমুনত কাশ্মীৰলৈ যাব বিচাৰিছিল আৰু তাৰ বাবেও প্ৰস্তুতি চলাইছিল। কিন্তু শহুৰেক জাকি খোটালে জোঁৱাইক ক’লে যে তেওঁলোক কাশ্মীৰলৈ যাব নালাগে বৰঞ্চ মক্কা আৰু মদিনালৈ নামাজৰ বাবে যাব লাগে।
এই বিষয়টোক লৈ যোৱা কেইদিনমানৰ পৰা শহুৰেক জাকি আৰু জোঁৱাই ইবাদৰ মাজত বিবাদ চলি আছিল। জোঁৱায়েকে তেওঁৰ কথা মানি নোলোৱাত জাকিৰ বৰ খং উঠিল। যোৱা নিশা প্ৰায় ৮ বজাত কল্যাণৰ লাল চৌকী অঞ্চলৰ পৰা ইবাদে ঘৰৰ ফালে গৈ আছিল। ইফালে ক্ষুব্ধ জাকিয়ে ৰিক্সা এখনত উঠি ইবাদৰ ওচৰলৈ আহি এচিডেৰে আক্ৰমণ কৰে। এই আক্ৰমণত গুৰুতৰভাৱে আহত হয় ইবাদ।
কল্যাণৰ এখন ব্যক্তিগত চিকিৎসালয়ত তেওঁ চিকিৎসাধীন হৈ আছে। ঘটনাৰ পিছত অভিযুক্ত শহুৰেক জাকি খোটালে ভয় খাই পলাই যায়। এই গোচৰত বজাৰপথ আৰক্ষীয়ে এটা গোচৰ ৰুজু কৰি শহুৰেকৰ সন্ধান আৰম্ভ কৰিছে।
Continue Reading
