এটা দশকৰ অন্তত পাকিস্তান ভ্ৰমণ ভাৰতৰ বৈদেশিক মন্ত্ৰীৰ; অংশগ্ৰহণ কৰিব ছাংহাই সহযোগিতা সংস্থাৰ বৈঠকত

ডিজিটেল ডেস্ক: ভাৰত পাকিস্তানৰ সম্পৰ্কৰ বিষয়ে সৰ্বজন বিদিত৷ প্ৰায় এটা দশকৰ অন্তত পাকিস্তান ভ্ৰমণ কৰিব ভাৰতৰ বিদেশ মন্ত্ৰীয়ে৷ ১৫ অক্টোবৰত পাকিস্তানত অনুষ্টিত হ’ব লগীয়া ছাংহাই সহযোগিতা সংস্থাৰ বৈঠকত ভাৰতৰ বৈদেশিক মন্ত্ৰী এছ জয়শংকৰে অংশগ্ৰহণ কৰিব । পাকিস্তান ভ্ৰমণৰ খবৰত সন্তুষ্টি প্ৰকাশ কৰিছে ৰাষ্ট্ৰীয় সন্মিলনৰ মুৰব্বী ফাৰুক আব্দুল্লাই। সাধাৰণতে এনে বৈঠকত প্ৰধানমন্ত্ৰীয়ে অংশগ্ৰহণ কৰে। পাকিস্তানত অনুষ্ঠিত হ’ব লগীয়া ছাংহাই  সহযোগিতা সংস্থাৰ বৈঠকত বৈদেশিক মন্ত্ৰীয়ে অংশগ্ৰহণ কৰাত সুখী বুলি মন্তব্য কৰে। ফাৰুক আব্দুল্লাই কয় যে জয়শংকৰে এছচিঅ’ৰ বাহিৰতো দুয়োখন দেশৰ সম্পৰ্ক উন্নত কৰৰা তথা দুয়োখন দেশৰ মাজত ঘৃণা হ্ৰাস কৰিবৰ বাবে কি ব্যৱস্থা গ্ৰহণ কৰা হয় সেই বিষয়েও আলেচনা কৰিব বুলি আশা প্ৰকাশ কৰিছে।

কাশ্মীৰৰ সাংবাদিকসকলৰ সৈতে হোৱা কথাবাৰ্তাত ৰাষ্ট্ৰীয় সন্মিলনৰ মুৰব্বীগৰাকীয়ে পশ্চিম এছিয়াৰ পৰিস্থিতিক লৈ উদ্বেগ প্ৰকাশ কৰি ইজৰাইলৰ কাৰ্যকলাপক গৰিহণা দিছে৷ তেওঁ লগতে কয় যে ইজৰাইলে লেবানন, ছিৰিয়া, ইৰাণ আৰু পেলেষ্টাইনত যিদৰে বোমা বিস্ফোৰণ কৰিছে সেয়া অত্যন্ত দুখজনক। যদি পৃথিৱীখনক বচাব বিচাৰো তেন্তে যুদ্ধ সমাধান হ’ব নোৱাৰে। যুদ্ধই নিৰীহ লোকৰ হত্যা কৰে বুলি মত প্ৰকাশ কৰে৷

উল্লেখযোগ্য যে বিগত বছৰত বিদেশ মন্ত্ৰী সুষমা স্বৰাজে হাৰ্ট অৱ এছিয়া সন্মিলনত অংশগ্ৰহণ কৰিবলৈ পাকিস্তান ভ্ৰমণত গৈছিল। দুয়োখন দেশৰ মাজত সম্প্ৰতি যি ধৰণৰ সম্পৰ্ক বৰ্তি আছে তাৰ পাছত দুই দেশৰ মাজত কোনো দ্বিপাক্ষিক আলোচনা হোৱাৰ আশা দেখা নাই। যোৱা বছৰ পাকিস্তানৰ বৈদেশিক মন্ত্ৰী বিলোৱাল ভুট্টো-জৰ্দাৰীয়ে এছচিঅ’ৰ বৈঠকৰ বাবে ভাৰত ভ্ৰমণ কৰাৰ সময়তো কোনো দ্বিপাক্ষিক আলোচনাত  মিলিত হোৱা নাছিল। তেওঁৰ ভাৰত ভ্ৰমণৰ সময়ছোৱাত দুয়োখন দেশৰ মাজত শান্তি আলোচনা পুনৰ আৰম্ভ কৰাৰ দায়িত্ব ভাৰতৰ ওপৰত বুলি হে মন্তব্য কৰিছিল৷