ডিজিটেল ডেস্কঃ পাকিস্তানৰ সিন্ধ প্ৰদেশৰ পৰা গ্ৰেপ্তাৰ এগৰাকী যুৱতীক। যুৱতীগৰাকীৰ পৰিয়ালৰ ১৩ জন সদস্যৰ মৃত্যু হৈছিল। ইয়াৰ পাছতে আৰক্ষী তদন্তত নামি পৰিছিল। যুৱতীগৰাকীয়ে তেওঁলোকৰ খাদ্যত বিহ মিহলি কৰাৰ অভিযোগ উঠিছে। পৰিয়ালে যুৱতীগৰাকীক নিজৰ পছন্দৰ ল’ৰা এটাক বিয়া কৰাবলৈ দিয়া নাছিল। যোৱা ৬ অক্টোবৰত তেওঁক গ্ৰেপ্তাৰ হয়। ঘটনাটো কিন্তু ১৯ আগষ্টৰে। আৰক্ষীয়ে ইমানদিনে তদন্ত কৰি অৱশেষত হত্যাকাৰীক চিনাক্ত কৰিবলৈ সক্ষম হয়।
একেটা পৰিয়ালৰে ১৩জন সদস্যৰ মৃত্যু হোৱাত সমগ্ৰ অঞ্চলতে চাঞ্চল্যৰ সৃষ্টি হৈছিল। এই মৃত্যুৰ তদন্ত কৰিবলৈ স্থানীয় ৰাইজেও দাবী তুলিছিল।
খৈৰপুৰৰ সমীপৰ হাইবাট খান ব্ৰহী গাঁৱত সংঘটিত হৈছে এই ঘটনা। ছোৱালীজনীয়ে নিজৰ ইচ্ছামতে বিয়া কৰাব বিচাৰিছিল। পৰিয়ালৰ লোকে তেওঁৰ কথা নুশুনিলে আৰু ছোৱালীজনীৰ প্ৰেমত বাধা ৰূপে থিয় হ'ল। সেই কথাত ছোৱালীজনীৰ বহুত খং উঠিল। ইয়াৰ পিছতে প্ৰেমিকৰ সৈতে মিলি তেওঁ পিতৃ-মাতৃৰ লগতে পৰিয়ালৰ সকলো সদস্যকে বিষাক্ত দ্ৰব্য খুৱাই ষড়যন্ত্ৰ ৰচনা কৰা বুলি অভিযোগ উঠিছে।
আৰক্ষীয়ে বিষয়টোৰ পুংখানুপুংখ তদন্ত কৰাত দেখা গ’ল যে অভিযুক্ত যুৱতী আৰু তেওঁৰ প্ৰেমিকে ৰুটি বনাবলৈ ব্যৱহাৰ কৰা আটাত বিহ মিহলাই লৈছিল আৰু সেই আটাৰে তৈয়াৰী ৰুটী পৰিয়ালৰ লোকসকলক খাবলৈ দিছিল। তদন্তৰ অন্তত আৰক্ষীয়ে হত্যাকাৰী যুৱতীক গ্ৰেপ্তাৰ কৰিছে। প্ৰেমিকগৰাকীৰ সন্ধানতো নামি পৰিছে আৰক্ষী।
Continue Reading
