উত্তৰ-পূৰ্বাঞ্চলৰ প্ৰথমগৰাকী গ্ৰেণ্ড মাষ্টাৰ হিচাপে গৌৰৱ কঢ়িয়াই অনা দবা খেলুৱৈ মায়ংক চৌধুৰীক গুৱাহাটী বিমান বন্দৰত উষ্ম আদৰণি

ডিজিটেল ডেস্ক: নিৰ্বাচনী ধুমুহাৰ মাজতেই অসমলৈ গৌৰৱ কঢ়িয়াই আনিলে গুৱাহাটীৰ মায়ংক চৌধুৰীয়ে৷ গুৱাহাটী মহানগৰীৰ ছাউথ্‌ পইণ্ট বিদ্যালয়ৰ দ্বাদশ শ্ৰেণীৰ ছাত্ৰ মায়ং চৌধুৰীয়ে অৰ্জন কৰিলে গ্ৰেণ্ড মাষ্টাৰৰ খিতাপ৷

চুইদেনত অনুষ্ঠিত হোৱা দবা খেলত অন্তিমখন দবা খেলৰ নম্‌চ সম্পূৰ্ণ কৰি ভাৰতবৰ্ষৰ ৯৪ সংখ্যক আনহাতে উত্তৰ-পূৰ্বাঞ্চলৰ প্ৰথমগৰাকী গ্ৰেণ্ড মাষ্টাৰ হ’বলৈ সক্ষম হ’ল মায়ংক চৌধুৰী৷ 

বিমান বন্দৰত আহি উপস্থিত হোৱাৰ লগে লগেই অসম দবা সন্থা তথা ছাউথ্‌ পইণ্ট বিদ্যালয়ৰ ছাত্ৰ-ছাত্ৰী, শিক্ষক-শিক্ষয়িত্ৰীৰ লগতে শুভাকাংক্ষীসকলে উষ্ম আদৰণি জনাই খেলুৱৈগৰাকীক৷ 

দবা খেলৰ জনপ্ৰিয়তাৰ প্ৰতি লক্ষ্য ৰাখি মায়ংকৰ এই সফলতাৰ পিছত অসম তথা উত্তৰ-পূৰ্বাঞ্চলৰ নৱপ্ৰজন্মৰ খেলুৱৈসকল অধিক উৎসাহী হ’ব বুলি আশাবাদী অসম দবা সন্থা৷ 

অসমৰ খেল মহাৰণৰ জৰিয়তে প্ৰায় ১২ লক্ষাধিক খেলুৱৈয়ে সুযোগ পোৱাৰ বাবে পূৰ্বতকৈও অধিক জনপ্ৰিয় হৈ পৰিছে দবা খেল৷ ইয়াৰ উপৰিও বৰ্তমান সময়লৈকে সমগ্ৰ ভাৰতবৰ্ষত নাম পঞ্জীয়ন হৈ আছে প্ৰায় ১ কোটিৰো অধিক দবা খেলুৱৈৰ নাম৷ 

বৰঝাৰ বিমান বন্দৰত উপস্থিত হৈ আৱেগিক হৈ পৰিল মায়ংকৰ মাতৃ৷ আনহাতে নৱনিৰ্মিত লোকপ্ৰিয় গোপীনাথ বৰদলৈ বিমানবন্দৰৰ নতুন টাৰ্মিনেলত অৱতৰণ কৰিবলৈ পায় সুখী হোৱাৰ লগতে আটকধুনীয়া বিমানবন্দৰৰ বাবে প্ৰধানমন্ত্ৰী নৰেন্দ্ৰ মোদীলৈ ধন্যবাদ জনালে মায়ংকৰ মাতৃয়ে ৷