হালধীয়া সতৰ্কতা দিল্লীত: বৰফে ঢাকিছে হিমাচল

ডিজিটেল ডেস্ক: ডাঠ কুঁৱলীৰ আচ্ছাদনত লুকাইছে দিল্লীবাসী৷ ঠেঁতুৱৈ ধৰা জাৰ, ঘন কুঁৱলী ফাকেৰেই আৰম্ভ হৈছে দৈনন্দিন জীৱন৷ ক্ৰমাৎ দৈনিক তাপমাত্ৰাও হ্ৰাস হৈ আহিছে দিল্লীত৷ ৰাজধানী চহৰখনৰ লগতে ইয়াৰ কাষৰীয়া অঞ্চলসমূহতো বৰ্তমান প্ৰচণ্ড শীতৰ প্ৰকোপ। বতৰ বিজ্ঞান কেন্দ্ৰই প্ৰকাশ কৰা অনুসৰি, দিল্লী আৰু ইয়াৰ কাষৰীয়া অঞ্চলসমূহত দেওবাৰে পুৱা তাপমান আছিল ৪.৬ ডিগ্ৰী ছেলছিয়াছ। আনহাতে জাফাৰপুৰ, লোধী ৰোড আদি অঞ্চলত সৰ্বনিম্ন তাপমান হয় ৩.৬ ডিগ্ৰী ছেলছিয়াছ।

উল্লেখ্য যে, খ্ৰীষ্টমাচৰ পূৰ্বে অহা প্ৰচণ্ড শীতৰ বাবেই বতৰ বিজ্ঞান কেন্দ্ৰই ৰাজধানীখনত দেও আৰু সোমবাৰে য়েল্ল এলাৰ্ট জাৰি কৰিছে। বতৰ বিজ্ঞান কেন্দ্ৰই জনোৱা মতে এইকেইটা দিনত দিল্লীত পাতলীয়া বৰষুণৰো সম্ভাৱনা আছে৷

আনহাতে, উত্তৰাখণ্ডতো শীতৰ প্ৰকোপত ব্যাহত হৈছে জনজীৱন। প্ৰচণ্ড শীতৰ বাবেই ১৮ৰ পৰা ২১ ডিচেম্বৰলৈকে উত্তৰাখণ্ডতো য়েল্ল এলাৰ্ট জাৰি কৰা হৈছে। পৰ্যটকৰ আকৰ্ষণথলী হিমাচল প্ৰদেশৰ কিছু অংশতো শূন্য ডিগ্ৰীৰ তললৈকে হ্ৰাস পাইছে তাপমাত্ৰা। বৰফেৰে ঢাক খাই পৰিছে সুউচ্চ পাহাৰ, গছ-গছনিও৷