বিদ্যুৎ বিলৰ পৰা ৰেহাই পাব জনপ্রতিনিধিয়ে

ডিজিটেল ডেস্ক: ৰাজ্য চৰকাৰৰ ব্যয় সংকোচন নীতি আৰু সেউজ শক্তিৰ ব্যৱহাৰৰ ক্ষেত্ৰত আন এক গুৰুত্বপূৰ্ণ অধ্যায়ৰ সূচনা হৈছে। জনতা ভৱনৰ পাছত এইবাৰ অসম বিধানসভাৰ বিধায়ক আৱাস চৌহদত বৃহৎ আকাৰত সৌৰশক্তি প্ৰকল্প ৰূপায়ণৰ কাম আৰম্ভ হৈছে। এই প্রকল্প সম্পূর্ণ হৈ উঠিলে বিধানসভা সচিবালয়ৰ ওপৰত থকা বিদ্যুৎ বিলৰ বিশাল বোজা বহু পৰিমাণে আঁতৰিব।

বিধানসভা সচিবালয়ৰ সূত্ৰৰ পৰা জানিব পৰা মতে, বিধায়ক আৱাস চৌহদৰ 'এ' ব্লকৰ পৰা ইতিমধ্যে উচ্চক্ষমতাসম্পন্ন ছ'লাৰ পেনেল সংযোগৰ কাম আৰম্ভ হৈছে। পর্যায়ক্রমে সমগ্ৰ আৱাস চৌহদ এই প্ৰকল্পৰ আওতালৈ অনা হ'ব। সংশ্লিষ্ট বিভাগে জনোৱা মতে, এই পেনেলৰ জৰিয়তে দিনৰ ভাগত সূৰ্যৰ পোহৰৰ পৰা শক্তি সংগ্ৰহ কৰি ২৪ ঘণ্টাই নিৰৱচ্ছিন্ন বিদ্যুৎ যোগান ধৰা সম্ভৱ হ'ব। 

উল্লেখযোগ্য যে দীর্ঘদিন ধৰি বিধানসভাৰ চৌহদত প্রয়োজনতকৈ অধিক বিদ্যুৎ ব্যয় হৈ অহা বুলি অভিযোগ উত্থাপন হৈ আহিছিল। বহু সময়ত আৱাস খালী হৈ থাকিলেও বিদ্যুৎ ব্যৱহাৰ হৈ থকাৰ ফলত চৰকাৰী কোষৰ ওপৰত অতিৰিক্ত বোজা পৰিছিল। এই পৰিস্থিতিৰ প্রতি লক্ষ্য ৰাখি প্রায় দুবছৰ পূৰ্বে মুখ্যমন্ত্ৰী হিমন্ত বিশ্ব শর্মাই এক গুৰুত্বপূৰ্ণ নিৰ্দেশনা জাৰি কৰিছিল। তেওঁ নিজৰ লগতে মুখ্য সচিব, সকলো মন্ত্ৰী আৰু জনপ্রতিনিধিয়ে নিজৰ চৰকাৰী আৱাসৰ বিদ্যুৎ মাচুল নিজে পৰিশোধ কৰিব লাগিব বুলি নির্দেশ দিছিল। সেই নির্দেশনাৰ পাছত ব্যয় ৰোধৰ বাবে বিকল্প শক্তিৰ সন্ধান আৰম্ভ হৈছিল। তাৰে অংশ হিচাপে প্রথমে জনতা ভৱনত সৌৰ পেনেল সফলভাৱে স্থাপন কৰা হয়। জনতা ভৱনৰ সফলতাৰ পাছত এতিয়া বিধানসভা সচিবালয়ে একে পথ অনুসৰণ কৰিছে। একে সময়তে এই প্রকল্পই পৰিৱেশ সুৰক্ষাতো অৰিহণা যোগাব।

উৎস: দৈনিক জনমভূমি