ডিজিটেল ডেস্ক: নিজৰ জীৱনৰ সমস্যা সহিব নোৱাৰি ৩৩ বছৰীয়া এগৰাকী মহিলাই নিজৰ ৬ বছৰীয়া পুত্ৰৰ সৈতে ১৮ মহলাৰ পৰা জাঁপ দি আত্মহত্যা কৰে। ঘটনাস্থলীৰ পৰা আৰক্ষীয়ে এখন ছুইচাইড নোট উদ্ধাৰ কৰিছে। তেওঁ স্বামীক উদ্দেশ্যি কৰি লিখিছে যে ‘‘মই যোৱাৰ পিছত দ্বিতীয় বিবাহ কৰি ল’বা।’’ আৰক্ষীৰ প্ৰাথমিক তদন্তত পোহৰলৈ আহিছে যে মহিলাগৰাকী মেৰুদণ্ডৰ ৰোগত আক্ৰান্ত হৈ আছিল। এই ঘটনা সংঘটিত হৈছে পুণেত।
মৃত মহিলাগৰাকীৰ পৰিচয় একতা বাংগড় আৰু পুত্ৰৰ বয়স ৬ বছৰ বুলি জানিব পৰা গৈছে। এই পৰিয়ালটোৱে পিম্পৰি-চিঞ্চৱড়ৰ চিজনেশ্বাৰ পাৰ্কস্থিত এখন হাই-প্ৰফাইল ছ’চাইটিত বাস কৰিছিল। একতাৰ স্বামী মনোজ বাংগড় পুণেৰ এটা আই টি কোম্পানীৰ ইঞ্জিনীয়াৰ। তদন্তত প্ৰকাশ পাইছে যে একতা বিগত কেইবা বছৰধৰি মেৰুদণ্ডৰ সৈতে জড়িত এক গুৰুতৰ ৰোগত ভুগি আছিল।
ঘটনাটো ঘটাৰ সময়ত ঘৰত একতা আৰু তেওঁৰ ছয় বছৰীয়া পুত্ৰ আছিল। সেই সময়তে একতাই নিজৰ পুত্ৰক লগত লৈ বিল্ডিংটোৰ ১৮ মহলালৈ যায় আৰু তাৰ পৰা জাঁপ দিয়ে। তলত পৰাৰ লগে লগে মাক আৰু পুত্ৰ দুয়োৰে থিতাতে মৃত্যু হয়।
জাঁপ দিয়াৰ পূৰ্বে একতাই ৭-৮ পৃষ্ঠাৰ এখন চুইচাইড নোট লিখি গৈছিল। ইয়াতে তেওঁ স্বামী মনোজৰ প্ৰতি নিজৰ আৱেগ প্ৰকাশ কৰিছে। একতাই লিখিছে যে ‘‘মই যোৱাৰ পিছত পুনৰ বিয়া পাতি ল’বা আৰু নিজৰ জীৱনটো নতুনকৈ আৰম্ভ কৰিবা।’’
ছুইচাইড নোটখনত একতাই নিজৰ পুত্ৰকো লগত লৈ যোৱাৰ সন্দৰ্ভত কিছু কথা উল্লেখ কৰিছে। একতাই লিখিছে যে মোৰ মৃত্যুৰ পিছত পুত্ৰই মোক মনত পেলাই থাকিব আৰু বাৰে বাৰে দেউতাকক সুধিব যে মা ক’ত আছে? ইয়াৰ দ্বাৰা স্বামীয়ে আমনি পাব। ইয়াৰ উপৰিও পুত্ৰ সন্তান থকাৰ অৱস্থাত স্বামীৰ বাবে পুনৰ বিবাহ কৰাটো কঠিন হৈ পৰিব পাৰে। গতিকে তেওঁ পুত্ৰক লগত লৈ যোৱাৰ সিদ্ধান্ত ল’লে।
একতা বিগত কেইবা বছৰধৰি মেৰুদণ্ডৰ সৈতে জড়িত ৰোগত পীড়িত হৈ হতাশাত ভুগিছিল। তেওঁ বিভিন্ন চিকিৎসালয়লৈ গৈ চিকিৎসা কৰাইছিল যদিও ৰোগ নিৰাময় হোৱা নাছিল। দীৰ্ঘদিন ধৰি ভুগি থকা এই দুৰ্ভোগৰ কথাও তেওঁ উল্লেখ কৰিছে।
ঘটনাটোৰ খবৰ পোৱাৰ লগে লগে ৱাকড় আৰক্ষী ঘটনাস্থলীত উপস্থিত হয়। এই সন্দৰ্ভত আৰক্ষী থানাত এটা অপমৃত্যুৰ গোচৰ ৰুজু কৰা হৈছে। আৰক্ষীয়ে ছুইচাইড নোটখন জব্দ কৰি তদন্ত আৰম্ভ কৰিছে। বৰ্তমান, মাতৃ আৰু পুত্ৰৰ এই মৰ্মান্তিক মৃত্যুৱে চিজনেশ্বাৰ পাৰ্ক ছ’চাইটিসহ সমগ্ৰ পিম্পৰি-চিঞ্চৱড়ত শোকাকুল পৰিৱেশৰ সৃষ্টি কৰিছে।
Continue Reading
