জল প্ৰলয় : প্ৰৱল বৃষ্টিপাত, ভূমিস্খলনে প্ৰাণ কাঢ়িলে ১৫জন লোকৰ

ডিজিটেল ডেস্ক : কেৰালাত প্ৰৱল বৃষ্টিপাতে সৃষ্টি কৰিছে প্ৰলয়ৰ। নেৰানেপেৰা বৰষুণৰ ফলত হোৱা জলপ্ৰলয়ে প্ৰাণ কাঢ়িছে কমেও ১৫জন লোকৰ। ৰাজ্যখনৰ ইডুকী আৰু কোট্টায়াম জিলাত প্ৰৱল বৃষ্টিপাতৰ ফলত হোৱা ভূমিস্খলনত এইসকল লোকে প্ৰাণ হেৰুৱায়। ইতিমধ্যে ৰাজ্যখনত সতৰ্কতামূলক ব্যৱস্থা গ্ৰহণ কৰা হৈছে।

দেওবাৰ আৰু সোমবাৰে সবৰিমালা মন্দিৰ দৰ্শনৰ বাবে যাবলগীয়া ভগৱান আয়াপ্পাৰ ভক্তসকলক ভ্ৰমণৰ পৰা বাৰণ কৰা হৈছে। আক্ৰান্ত অঞ্চলবোৰত উদ্ধাৰ অভিযান চলাই থকা হৈছে। ৰাজ্যখনৰ বিভিন্ন প্ৰান্তত নেৰানেপেৰাকৈ বৰষুণ হৈ থকাৰ ফলতে পৰিস্থিতিৰ দ্ৰুত অৱনতি ঘটিছে। কেৰালাৰ পৰিস্থিতি অতি গভীৰভাৱে নিৰীক্ষণ কৰি থকা বুলি ব্যক্ত কৰি কেন্দ্ৰীয় গৃহমন্ত্ৰী অমিত শ্বাহে কয় যে, সকলো জৰুৰী ব্যৱস্থা ইতিমধ্যে গ্ৰহণ কৰা হৈছে আৰু উদ্ধাৰকাৰী বাহিনীক কেৰালালৈ পঠিওৱা হৈছে। আমি কেৰালাৰ জনসাধাৰণৰ বাবে প্ৰাৰ্থনা কৰিছোঁ।

ইফালে, পৰিস্থিতি সন্দপৰ্ভত কেৰালাৰ মুখ্যমন্ত্ৰী পিনাৰায়ী বিজয়নে এখন উচ্চস্তৰীয় বৈঠক অনুস্থিত কৰে আৰু ক্ষতিগ্ৰস্ত লোকসকলক নিৰাপদে উদ্ধাৰ কৰিবলৈ সকলো ধৰণৰ ব্যৱস্থা গ্ৰহণৰ নিৰ্দেশ দিয়ে।