জলমগ্ন ৰাজধানী চহৰ দিল্লী: বৰষুণে ডুবালে বিমান বন্দৰ

নতুন দিল্লীঃ দেশৰ ৰাজধানী চহৰ দিল্লীত মুষলধাৰ বৰষুণৰ বাবে স্তদ্ধ হৈ পৰিছে সাধাৰণ জনজীৱন। শনিবাৰে ৰাজধানী চহৰখনত হোৱা বৰষুণৰ প্ৰাবল্য ইমানেই বেছি আছিল যে যোৱা ৪৬ বছৰত হোৱা সকলোতকৈ সৰ্বাধিক বৰষুণৰ মাত্ৰা অতিক্ৰম কৰিছে। ভাৰতীয় বতৰ বিজ্ঞান কেন্দ্ৰই ইতিমধ্যে চহৰখনত 'অৰেঞ্জ এলাৰ্ট' জাৰি কৰিছে আৰু প্ৰশাসনে দুৰ্যোগ প্ৰশমন বিভাগক যিকোনো জৰুৰীকালীন পৰিস্থিতিৰ বাবে সাজু হৈ থাকিবলৈ নিৰ্দেশনা দিছে। উল্লেখ্য যে বতৰ বিজ্ঞান কেন্দ্ৰই চহৰখনত আৰু অধিক বৃষ্টিপাতৰ লগতে বজ্ৰপাতৰ হোৱাৰো আশংকা কৰিছে তদুপৰি বানপানী হোৱা অঞ্চললৈ সাধাৰণ লোকক নাযাবলৈ আহ্বান জনাইছে।

ধাৰাষাৰ বৰষুণৰ বাবে দিল্লীৰ ইন্দিৰা গান্ধী আন্তৰাষ্ট্ৰীয় বিমান বন্দৰৰ বাহিৰ অংশৰ লগতে ভিতৰ ভাগতো ইতিমধ্যে পানীয়ে বুৰাই পেলালে যাৰ ফলত যাত্ৰীসকল এতিয়া বিমোৰত পৰিছে। প্ৰতিকূল বতৰৰ বাবে বিমান বন্দৰ কতৃপক্ষই দিল্লীলৈ আগমন আৰু প্ৰস্থান কৰা সকলো বিমানৰ সময়সূচী সলনি কৰিছে। দিল্লী আন্তৰাষ্ট্ৰীয় বিমান বন্দৰ কতৃপক্ষই টুইটাৰত কয় যে, বিমান বন্দৰ কতৃপক্ষই বন্দৰটোত জমা হৈ থকা পানী সোনকালে আতৰাবলৈ চেষ্টা কৰি আছে আৰু যাত্ৰীসকলৰ যাতে ভ্ৰমণত কোনোধৰণৰ সমস্য নহয় তাৰ বাবে চাৰিখন ঘৰুৱা বিমান আৰু এখন আন্ত:ৰাষ্ট্ৰীয় বিমান চুবুৰীয়া আন এটা বন্দৰলৈ স্থানান্তৰ কৰিছে যাতে তাৰ পৰা যাত্ৰীসকলে নিৰ্দিষ্ট গন্তব্য স্থানলৈ যাব পাৰে।