ডিজিটেল ডেস্কঃ পুনৰ ভাৰতীয় সেনাৰ তেজেৰে ৰাঙলী হ’ল ভূস্বৰ্গ কাশ্মীৰ। মঙলবাৰে জম্মু-কাশ্মীৰত উগ্ৰপন্থীৰ সৈতে সংঘৰ্ষত সেনাৰ এজন মেজৰ সহ চাৰিজন জোৱান নিহত হয় । জম্মুৰ পাহাৰীয়া ডোডা অঞ্চলত এই ঘটনা সংঘটিত হৈছে। কাশ্মীৰত যোৱা কেইমাহমানত ভাৰতীয় সেনাৰ ওপৰত কেইবাটাও বৃহৎ আক্ৰমণৰ ঘটন সংঘটিত হৈছে।
সন্ত্ৰাসবাদীৰে হোৱা সংঘৰ্ষত আহত হয় আন এজন জোৱান। ভাৰতীয় সেনাই যোৱা নিশাৰে পৰা উত্তৰ ডোডাত অভিযান আৰম্ভ কৰিছিল। সন্ত্ৰাসবাদীৰ বিৰুদ্ধে অভিযান চলাই থকাৰ সময়তে নিশা প্ৰায় ৯ বজাত সন্ত্ৰাসবাদীয়ে সেনাৰ ওপৰত ভয়ংকৰ আক্ৰমণ চলায়। এই আক্ৰমণত মেজৰসহ চাৰিজন জোৱান নিহত হয়। ঘটনাৰ পিছতে অতিৰিক্ত সৈন্য অঞ্চলটোলৈ প্ৰেৰণ কৰা হৈছে। উল্লেখ্য ৯ জুলাইতকাশ্মীৰৰ কাথুৱা অঞ্চলত এজন কনিষ্ঠ কমিচনড বিষয়াকে ধৰি পাঁচজন জোৱান নিহত হৈছিল।
একেদৰে ৯ জুনত তীৰ্থযাত্ৰীৰ গাড়ীত পাক সন্ত্ৰাসবাদীয়ে আক্ৰমণ চলোৱাৰ ফলত গাড়ীখনে নিয়ন্ত্ৰণ হেৰুৱাই এটা খাৱৈত পৰিছিল। ফলত ৯ জন লোকৰ মৃত্যু ঘটাৰ লগতে ৩০ জন লোক আহত হয়। তথ্য অনুসৰি ২০২৩ বৰ্ষৰ ২১ অক্টোবৰৰ পৰা চলিত বৰ্ষৰ ৮ জুলাইৰ ভিতৰত কাশ্মীৰত ৪৩ জন ভাৰতীয় জোৱান নিহত হৈছে।
Continue Reading
