ডিজিটেল ডেস্কঃ উচ্চতম ন্যায়ালয়ে লাভ কৰিলে দুগৰাকী নতুন ন্যায়াধীশ। লক্ষ্যণীয় কথাটো হ’ল প্ৰথমবাৰৰ বাবে মণিপুৰে লাভ কৰিলে উচ্চতম ন্যায়ালয়ৰ এগৰাকী ন্যায়াধীশ। ৰাষ্ট্ৰপতি দ্ৰৌপদী মুৰ্মুৱে উচ্চতম ন্যায়ালয়ত ন্যায়াধীশ এন কোটিশ্বৰ সিং আৰু ন্যায়াধীশ আৰ মহাদেৱানৰ নিযুক্তিতঅনুমোদন জনায়। আইন মন্ত্ৰী অৰ্জুন ৰাম মেঘৱালে আনুষ্ঠানিকভাৱে ঘোষণা কৰিলে ন্যায়াধীশগৰাকীৰ নিযুক্তিৰ কথা। ইয়াৰ ফলত উচ্চতম ন্যায়ালয়ত খালী হৈ থকা ন্যায়াধীশৰ পদসমূহ পূৰণ হৈ পৰিল।
উচ্চতম ন্যায়ালয়ৰ কলেজিয়ামে পূৰ্বে এই দুগৰাকী ন্যায়াধীশক পদোন্নতিৰ পৰামৰ্শ দিছিল। দুগৰাকীকৈ নতুন ন্যায়াধীশ নিযুক্তিৰ লগে লগে ভাৰতৰ মুখ্য ন্যায়াধীশ ডি ৱাই চন্দ্ৰচুদকে ধৰি উচ্চতম ন্যায়ালয়ত ন্যায়াধীশৰ সংখ্যা ৩৪জনলৈ বৃদ্ধি পাইছে। মন কৰিবলগীয়া যে উচ্চতম ন্যায়ালয়ত নিযুক্তি লাভ কৰা মণিপুৰৰ প্ৰথমজন ন্যায়াধীশ হিচাবে পৰিগণিত হৈছে এন কোটিশ্বৰ সিং । বৰ্তমান তেওঁ জম্মু-কাশ্মীৰ আৰু লাডাখৰ মুখ্য ন্যায়াধীশ হিচাবে কাৰ্যনিৰ্বাহ কৰি আছে। এন ইবোটোম্বি সিং মণিপুৰৰ প্ৰথম এডভোকেট জেনেৰেল বা চৰকাৰী অধিবক্তা হৈছিল। ইবোটোম্বি সিঙৰেই পুত্ৰ ন্যায়াধীশ এন কোটিশ্বৰ সিং।
দিল্লী বিশ্ববিদ্যালয়ৰ আইনৰ ছাত্ৰ এন কোটিশ্বৰ সিঙে ১৯৮৬ চনত অধিবক্তা হিচাপে নিজৰ কেৰিয়াৰ আৰম্ভ কৰিছিল। তেওঁ মণিপুৰ উচ্চ ন্যায়ালয় আৰু গুৱাহাটী উচ্চ ন্যায়ালয়তো কাম কৰিছিল। ন্যায়াধীশ হোৱাৰ পূৰ্বে তেওঁ মণিপুৰ উচ্চ ন্যায়ালয়ত মহাধিবক্তা হিচাপেও কাম কৰিছিল। আনহাতে, ন্যায়াধীশ মহাদেৱনে বৰ্তমান মাদ্ৰাজ উচ্চ ন্যায়ালয়ৰ মুখ্য ন্যায়াধীশ হিচাপে কাৰ্যনিৰ্বাহ কৰি আছে। মাদ্ৰাজ আইন মহাবিদ্যালয়ৰ প্ৰাক্তন ছাত্ৰ মহাদেৱনে অধিবক্তা হিচাপে ৯০০০ গোচৰৰ শুনানিত অংশগ্ৰহণ কৰিছে। তেওঁ লগতে তামিলনাডুত চৰকাৰী মহাধিবক্তা হিচাপেও কাম কৰিছিল। তেওঁ ২০১৩ চনত মাদ্ৰাজ উচ্চ ন্যায়ালয়ত ন্যায়াধীশ হিচাবে নিযুক্তি লাভ কৰিছিল।
Continue Reading
