কলুষিত পিতৃ-কন্যাৰ সম্পৰ্কও : কিদৰে অৱক্ষয় ঘটিছে মানৱীয় সম্পৰ্কৰ?

ডিজিটেল ডেস্ক : মানৱীয়তাৰ অৱক্ষয়ৰ নিত্য-নতুন স্বৰূপ এতিয়া পোহৰলৈ আহিবলৈ আৰম্ভ কৰিছে। এতিয়া মানৱীয় সম্পৰ্কই ইয়াৰ চিৰাচৰিত পবিত্ৰতা হেৰুৱাই কলুষিত হ’বলৈ আৰম্ভ কৰিছে। কলংকিত হৈছে পিতৃ-কন্যাৰ পবিত্ৰ সম্পৰ্কও। এইবাৰ ৰাজস্থানত সংঘটিত হৈছে এক জঘন্য ঘটনা। ৰাজস্থানৰ জালোৰ জিলাত এজন লম্পট পিতৃয়ে ধৰ্ষণ কৰিলে নিজ কন্যাক। এই ঘটনাৰ বিষয়ে অৱগত হোৱাৰ পাছতে লোকজনৰ পুত্ৰয়ো আত্মহত্যা কৰে। আৰক্ষীয়ে আজি এই জঘন্য ঘটনাৰ বিষয়ে প্ৰকাশ কৰিছে।

কিশোৰীগৰাকীয়ে তেওঁৰ খুৰীয়েকক সমস্ত ঘটনা বিৱৰি কোৱাৰ এটা অডিঅ’ ক্লিপ পোহৰলৈ অহাৰ পাছতে লোকজনৰ পুত্ৰ তথা কিশোৰীগৰাকীৰ ভাতৃয়ে এই ঘটনাৰ বিষয়ে অৱগত হয়। শনিবাৰে এই অডিঅ’ পোহৰলৈ অহাৰ পাছত এই ৩২মিনিটৰ অডিঅ’ৰ আঁত ধৰি আৰক্ষীয়ে তদন্ত আৰম্ভ কৰে। কিন্তু শনিবাৰেই কিশোৰীগৰাকীৰ ভাতৃয়ে নৰ্মদা কেনেলত জাঁপ দি আত্মহত্যা কৰে। ইফালে অভিযুক্ত কলংকিত পিতৃজনে আৰক্ষীৰ দল তেওঁৰ ঘৰত উপস্থিত হোৱাৰ পূৰ্বেই ঘৰৰপৰা পলায়ন কৰে।

পিতৃয়ে মোবাইল ফোন কিনি দিম বুলি গাড়ীত উঠাই লৈ গৈ নিজ কন্যাক ধৰ্ষণ কৰা বুলি তেওঁ নিজৰ খুৰীয়েকৰ আগত বিৱৰি কৈছিল। কিশোৰীগৰাকীয়ে কোৱা মতে, তেওঁ মাতৃয়ে সেইদিনা তেওঁ ভাতৃকো লগত নিবলৈ দেউতাকক কৈছিল যদিও তেওঁ সেইকথা অস্বীকাৰ কৰিছিল। পূৰ্বেও কিশোৰীগৰাকী শুই থকা সময়ত পিতৃয়ে অবাঞ্চিতভাৱে তেওঁক স্পৰ্শ কৰি যৌন আতিশয্য চলাইছিল বুলি কিশোৰীগৰাকীয়ে তেওঁৰ খুৰীয়েকৰ আগত বিবৰি কয়। কিশোৰীগৰাকীয়ে অভিযোগ কৰিছে যে, পিতৃৰ দুষ্কাৰ্যৰ কথা কোৱাৰ পাছত তেওঁৰ মাতৃয়ে তেওঁকহে ওলোটাই গালি পাৰিছিল। এনে জঘন্য ঘটনাই সমগ্ৰ দেশতে আলোড়নৰ সৃষ্টি কৰিছে।