পালাকাড: বৃহস্পতিবাৰে কেৰালাৰ পালাকাদ জিলাৰ এটা কুকুৰা খাদ্য প্ৰকল্পত তেল নিৰ্গমনৰ ফলত অগ্নিনিৰ্বাপক বাহিনীসহ ২০ জন লোক আহত হয়। সন্ধিয়া প্ৰায় ৫ বজাত থিৰুভিজামকুন্নুৰ পাহাৰৰ টিলাত শিহৰণকাৰী ঘটনাটো সংঘটিত হৈছিল। অগ্নিনিৰ্বাপক বাহিনীৰ এজন কৰ্মীসহ ৩জন লোক গুৰুতৰভাৱে আহত হয়। জানিব পৰা মতে, আহত আটাইকেইজনক ততাতৈয়াকৈ চিকিৎসালয়ত ভৰ্তি কৰোৱা হয়।
সংবাদ প্ৰতিষ্ঠান পিটিআই-ৰ আগত এগৰাকী আৰক্ষী বিষয়াই সদৰী কৰে যে, ‘এনআৰআই-ৰ মালিকাধীন প্ৰকল্পটোৱে আজি এটা পৰীক্ষণ কাৰ্য চলাইছিল, কিন্তু তেল নিৰ্গমনৰ ফলত প্ৰকল্পটোক জুয়ে বেৰী ধৰে। তেওঁলোকে অগ্নিনিৰ্বাপক বাহিনী বিভাগৰ পৰা সহায় বিচাৰিছিল। অগ্নিনিৰ্বাপক বাহিনীয়েও জুই নিৰ্বাপনৰ বাবে যৎপৰোনাস্তি চেষ্টা কৰিছিল। কিন্তু তেলভৰ্তি পাত্ৰৰ উত্তাপ মাত্ৰাধিক বৃদ্ধি পোৱাৰ ফলত প্ৰচণ্ড বিস্ফোৰণ সংঘটিত হয়।’ জানিব পৰা মতে, সম্প্ৰতি আহত আটাইকেইজনৰ অৱস্থা সুস্থিৰ।
