নিমন্ত্ৰণ নোপোৱাকৈয়ে পাকিস্তানলৈ যায়, কিন্তু মণিপুৰলৈ নাযায়: মোদীক তীব্ৰ সমালোচনা মল্লিকার্জুন খৰ্গেৰ

ডিজিটেল ডেস্কঃ ভুবনেশ্বৰত অনুষ্ঠিত কংগ্ৰেছৰ ‘সংবিধান বচাও সমাৱেশ’ নামৰ ৰাজনৈতিক সমাবেশত অংশ লৈ কংগ্ৰেছ সভাপতি আৰু ৰাজ্যসভাৰ নেতা মল্লিকার্জুন খৰ্গেই প্ৰধানমন্ত্ৰী নৰেন্দ্ৰ মোদীক তীব্ৰ সমালোচনা কৰে। তেওঁ কয়, “মণিপুৰত ঘৰ জ্বলাই দিয়া হৈছে, শিশুবোৰে শিক্ষা লাভ কৰিব পৰা নাই, বিদ্যালয়সমূহ বন্ধ হৈ আছে, কিন্তু প্ৰধানমন্ত্ৰীয়ে সেই অঞ্চললৈ এতিয়ালৈকে ভৰি দিয়া নাই।”

কংগ্ৰেছৰ ৰাষ্ট্ৰীয় সভাপতি মল্লিকার্জুন খৰ্গেই মণিপুৰ সমস্যাক লৈ প্ৰধানমন্ত্ৰী নৰেন্দ্ৰ মোদীক তীব্ৰ সমালোচনা কৰে। ওড়িশাৰ এখন জনসভাত ভাষণ দিয়াৰ সময়ত খৰ্গেই কয় যে, প্ৰধানমন্ত্ৰী মোদীৰ মূল উদ্দেশ্য হৈছে দেশৰ সংবিধানক শেষ কৰি দিয়া। তেওঁ কয়, “যদি সংবিধান শেষ হয়, তেন্তে আপুনি পোৱা ভোটাধিকাৰ কাঢ়ি লোৱা হ’ব।

মণিপুৰৰ সমস্যাৰ বিষয়ে মন্তব্য কৰি মল্লিকার্জুন খৰ্গেয়ে প্ৰধানমন্ত্ৰী নৰেন্দ্ৰ মোদীক সমালোচনা কৰি কয়, " ৰাহুল গান্ধী মণিপুৰলৈ যাব পাৰে, তাত লোকসকলৰ সৈতে দেখা-সাক্ষাৎ কৰিব পাৰে, কিন্তু প্ৰধানমন্ত্ৰীয়ে এতিয়ালৈকে মণিপুৰলৈ নগ’ল। ঘৰসমূহ জ্বলি আছে, বিদ্যালয় বন্ধ, শিশুবোৰ শিক্ষাৰ পৰা বঞ্চিত হৈ আছে, কিন্তু প্ৰধানমন্ত্ৰীয়ে সেইফালে এবাৰো ঘূৰি নাচালে। বিদেশ ভ্ৰমণ প্ৰয়োজনীয় হ’ব পাৰে, কিন্তু নিজৰ দেশৰ মানুহৰ যন্ত্ৰণা আৰু কষ্টখিনিও দেখা উচিত।”

তেওঁ লগতে কয় , " প্ৰধানমন্ত্ৰী নৰেন্দ্ৰ মোদীয়ে নিমন্ত্ৰণ নোপোৱাকৈ পাকিস্তানলৈ যায়, তাত থকা প্ৰতিজন নেতাক সাৱটি ধৰে, কিন্তু মণিপুৰক আওকাণ কৰে ৷ দেশৰ প্ৰতি প্ৰধানমন্ত্ৰীৰ কোনো সহানুভূতি নাই। তেওঁ কেৱল বিদেশত কোনে তেওঁক বঁটা দিব বা মালা পিন্ধিব সেইটোহে চিন্তা কৰে। দেশৰ ভিতৰৰ ঘাঁবোৰ তেওঁ দেখা নাপায়। প্ৰধানমন্ত্ৰী মোদীৰ মণিপুৰলৈ যোৱাৰ সাহসো নাই আৰু তেওঁ যাবও বিচৰা নাই । "

মল্লিকাৰ্জুন খৰ্গেই পুনৰ কয় , " বিজেপিয়ে লাখ লাখ ভোটৰ ৰিগিং কৰি মহাৰাষ্ট্ৰত চৰকাৰ গঠন কৰিছে ৷ বিহাৰতো বিজেপিৰ ৰাইজে একে কাম কৰিবলৈ চেষ্টা কৰিছে ৷ এনেদৰে চলি থাকিলে গণতন্ত্ৰ বাচি নাথাকিব , গতিকে আমি এনে লোকক ক্ষমতাৰ পৰা আঁতৰাই দিয়া উচিত ৷ আজি দেশত গণতন্ত্ৰ আছে , গতিকে দলিত আৰু আদিবাসীয়ে সংৰক্ষণ লাভ কৰিছে ৷ "

ওড়িশা চৰকাৰক লক্ষ্য কৰি কংগ্ৰেছৰ সভাপতিগৰাকীয়ে কয়, "মই অনুসূচিত জাতি , অনুসূচিত জাতি , অ'বিচি আৰু সংখ্যালঘু সম্প্ৰদায়ৰ লোকৰ ভয়ৰ অন্ত পেলাব বিচাৰো , যাতে তেওঁলোকে নিজৰ অধিকাৰৰ বাবে যুঁজিব পাৰে। যদি আপুনি যুঁজ নকৰে তেন্তে আপোনাৰ অধিকাৰ লাভ নকৰিব। শেহতীয়াকৈ ওড়িশাত , দুজন দলিত লোকক প্ৰহাৰ কৰা হৈছিল, তেওঁলোকৰ চুলি কটা হৈছিল, তেওঁলোকক লেতেৰা পানী খাবলৈ বাধ্য কৰা হৈছিল, আৰু আঁঠুৰে খোজ কাঢ়িবলৈ বাধ্য কৰা হৈছিল। বিজেপি চৰকাৰৰ সময়ত দলিতসকলৰ এই অৱস্থা হৈছে। কংগ্ৰেছ দলে মানুহৰ অধিকাৰৰ বাবে সত্যাগ্ৰহ কৰি আছে, কিন্তু চৰকাৰখন টোপনি গৈছে।কংগ্ৰেছ দলে সত্যাগ্ৰহৰ জৰিয়তে সাধাৰণ মানুহৰ অধিকাৰ আৰু গণতন্ত্ৰ ৰক্ষাৰ বাবে সংগ্ৰাম কৰি থাকিব।"