ডিজিটেল ডেস্কঃ নয়ডাৰ এটা আৱাসিক কমপ্লেক্সত পোহনীয়া কুকুৰক খোজ কঢ়াবলৈ লৈ গৈ থকা অৱস্থাত বৃদ্ধ দম্পতীৰ সৈতে তীব্ৰ কাজিয়াত লিপ্ত হয় দুগৰাকী মহিলা। তৰ্ক ইমানেই তীব্ৰতৰ হৈ পৰিল যে এগৰাকী মহিলাই আক্ৰমণ কৰে বৃদ্ধ দম্পতীক। ইয়াৰ পিছত নয়ডা আৰক্ষীয়ে মহিলাকেইগৰাকীৰ বিৰুদ্ধে গোচৰ ৰুজু কৰে ৷ আইনী প্ৰক্ৰিয়া বৰ্তমান অব্যাহত আছে।
বৃদ্ধ দম্পতীহালে মহিলাসকলক তেওঁলোকৰ কুকুৰটো বান্ধিবলৈ কোৱাৰ পৰাই তৰ্ক আৰম্ভ হোৱা বুলি জানিব পৰা গৈছে। এজন সহবাসীয়ে ৰেকৰ্ড কৰা এটা ভিডিঅ’ত দুগৰাকী মহিলাই দম্পতীহালৰ সৈতে কাজিয়া কৰা দেখা গৈছে। এই ভিডিঅ’ এতিয়া ছ’চিয়েল মিডিয়াত ভাইৰেল হৈ পৰিছে ৷ ভিডিঅ’টোত এগৰাকী মহিলাই কয়, "মই বহুত কিবা-কিবি কৰিব পাৰো। মই এনেকুৱা এটা চৰ মাৰিম...," এইষাৰ কথা কৈয়ে মহিলাগৰাকীক বৃদ্ধাগৰাকীক চৰ মাৰি দিয়ে।
ইনষ্টাগ্ৰামত পোষ্ট কৰা ভাইৰেল ভিডিঅ’ত দুগৰাকী মহিলাই এহাল দম্পতীৰ সৈতে কাজিয়া কৰা দেখা গৈছে ৷ তেওঁলোকৰ গোচৰত আন বাসিন্দাসকলে হস্তক্ষেপ কৰি জ্যেষ্ঠ নাগৰিকক আক্ৰমণ কৰাত বাধা দিয়ে। নয়ডাৰ ৭৮ নং ছেক্টৰৰ হাইড পাৰ্ক ছ’চাইটিত সংঘটিত হৈছে এই ঘটনা।
এক প্রতিবেদন অনুসৰি এজন বৃদ্ধ লোকৰ পৰা এজাহাৰ পোৱাৰ পাছতে ছেক্টৰ ১১৩ থানাত আক্রমণ আৰু অপৰাধমূলক ভাবুকিৰ গোচৰ ৰুজু কৰা বুলি আৰক্ষীয়ে জানিবলৈ দিয়ে৷ অৱশ্যে শুকুৰবাৰে পুৱা মহিলাগৰাকীয়ে ক্ষমা বিচৰাৰ পিছতে বিষয়টো সমাধান হয়।
Continue Reading
