ডিজিটেল ডেস্কঃ ভাৰতীয় সেনাবাহিনীত নতুন সশস্ত্ৰ বাহিনীৰ নিযুক্তিৰ পৰিকল্পনা কৰিছে ভাৰত চৰকাৰে। নতুন সশস্ত্ৰ বাহিনীৰ নামকৰণ কৰা হ’ব বলীউডৰ তাৰকা অমিতাভ বচ্চন অভিনীত নব্বৈৰ দশকৰ জনপ্ৰিয় ছবি ‘অগ্নিপথ’ৰ নামেৰে। মঙলবাৰে ভাৰত চৰকাৰৰ হৈ তিনিগৰাকী সেনা প্ৰধানে এইবিষয়ে ঘোষণা কৰিছে।
ভাৰত চৰকাৰৰ ‘অগ্নিপথ’ প্ৰকল্পৰ সন্দৰ্ভত ভাষণ দি প্ৰতিৰক্ষা মন্ত্ৰী ৰাজনাথ সিঙে কয়, ‘এই সিদ্ধান্ত ঐতিহাসিক। দুই সপ্তাহ আগেয়ে এই প্ৰকল্পৰ কথা প্ৰধানমন্ত্ৰীক জনাইছিল তিনিগৰাকী সেনা প্ৰধানে। অৱশেষত, মঙলবাৰে এই প্ৰকল্পৰ নাম পোহৰলৈ আহিল। নতুন ‘অগ্নিপথ’ প্ৰকল্পত চাৰি বছৰৰ বাবে সেনা বাহিনীত নিযুক্তি দিয়া হ’ব জোৱানসকলক। এই প্ৰকল্পৰ অধীনত ১৭ৰ পৰা ২১ বছৰ বয়সৰ ৪৫ হাজাৰ ভাৰতীয়ই ভাৰতীয় সেনাবাহিনীত কাম কৰাৰ সুযোগ লাভ কৰিব বুলিও জানিবলৈ পোৱা গৈছে।
এই জোৱানসকলে চাৰি বছৰৰ প্ৰকল্পৰ বাবে সেনাবাহিনীত ছমাহৰ প্ৰশিক্ষণ লাভ কৰিব। প্ৰতিমাহে ৩০ৰ পৰা ৪০ হাজাৰ টকাৰ দৰমহা আৰু অন্যান্য ভাট্টাও প্ৰদান কৰা হ’ব জোৱানসকলক। খবৰ অনুসৰি, এই প্ৰকল্পটোক বিভিন্ন স্তৰত সমালোচিত হোৱাও দেখা গৈছে। এই প্ৰকল্পই আনকি সামৰিক বাহিনীৰ দেশপ্ৰেম আৰু পেছাদাৰীত্বত প্ৰভাৱ পেলাব পাৰে বুলিও আশংকা প্ৰকাশ কৰিছে বহুজনে।
Continue Reading
