ডিজিটেল ডেস্কঃ ২০২৪ বৰ্ষৰ আজি অন্তিমটো দিন, বছৰটোক সুন্দৰকৈ বিদায় আৰু নৱবৰ্ষক বিশাল উদযাপনৰ সৈতে স্বাগতম জনাবলৈ সকলোৱে উৎসাহিত হৈ পৰিছে ৷ সমূহ অসমবাসীৰ এই উদযাপনৰ সময়ত তেওঁলোকৰ প্ৰিয় চিনেমাসমূহৰ গীতবোৰতকৈ আন একোৱেই উন্মাদ নকৰে । এই বছৰ আমি আপোনাৰ পাৰ্টী প্লেলিষ্টৰ বাবে উপযুক্ত গীতৰ এক ভাণ্ডাৰ লৈ আনিছো ।
১)যুদ্ধ
অসমৰ সকলোকে নাচিবলৈ বাধ্য কৰোৱা এটি অসমীয়া গীত হৈছে যুদ্ধ ৷ প্ৰাণদ্বীপ আৰু ৰিদিপ্তা শৰ্মাৰ কণ্ঠত এই গীতটি সকলোৰে প্ৰিয় ৷ কথা শোণিত গগৈৰ আৰু বিজয় শংকৰৰ সংগীত ৷ গীতটিত অভিনয় কৰিছে ত্ৰিদ্বীপ লাহন, চুমকী কছাৰী, নিৰুপম শইকীয়া, শিল্পীশিখা বৰাই ৷ গীতটিয়ে ইতিমধ্যে ইউটিউবত ২৯ মিলিয়ন দৰ্শক অতিক্ৰম কৰিছে ৷
২)মনবন্ধু- স্বৰ্গৰথ
এ এম টেলিভিশ্যন প্ৰাইভেট লিমিটেডৰ বেনাৰত ড০ সঞ্জীৱ নাৰায়ণ আৰু ডা: অক্ষতা নাৰায়ণে প্ৰযোজনা কৰা ৰাজেশ ভূঞা পৰিচালিত ছবি স্বৰ্গৰথৰ এটি গীত- মনবন্ধু ৷ গীতটিত কন্ঠদান কৰিছে অৰূপজ্যোতি বৰুৱাই ৷ গীতটিৰ সংগীত অনুৰাগ শইকীয়াৰ ৷ শান্তনু ৰৌমৰীয়াৰ কথা আৰু ৰাজেশ ভূঞা দ্বাৰা পৰিচালিত এই গীতৰ দৃশ্যত নাগাৰা নামেৰে জনপ্ৰিয় হোৱা শিল্পী কৰিশ্মা নাথকো বিশেষ ৰূপত দেখা গৈছিল। এই গীতটিৰে আপোনাৰ সন্ধিয়া জীপাল কৰক ৷
৩)বাও লাগিব
সকলোৰে মুখে মুখে থকা এই বৰ্ষৰ এটি গীত ‘বাও লাগিব’ ৷ গীতটিত কণ্ঠদান কৰিছে নীলাভ নীতাই ৷ কথা আৰু সুৰ দেৱজিৎ বৰাৰ ৷ গীতটিৰ সংগীত প্ৰনয় দত্তৰ ৷ গীতটিত অভিনয় কৰিছে নীল তামূলী আৰু নীলাভ নীতাই ৷ গীতটিয়ে ইতিমধ্যে ইউটিউবত ১৫ মিলিয়ন দৰ্শক লাভ কৰিবলৈ সক্ষম হৈছে ৷
৪)পাগল মন
জনম কাশ্যপৰ কণ্ঠত পাগল মন শীৰ্ষক গীতটি এই বৰ্ষৰ অন্যতম জনপ্ৰিয় গীত ৷ নিপন কুমাৰৰ কথা আৰু অভিলেখ বৰদলৈৰ সুৰেৰে পাগল মন গীতটি বৰ্তমান অসমবাসীৰ মুখে মুখে ৷ গীতটিত অভিনয় কৰিছে প্ৰীয়ম পল্লৱী আৰু জনম কাশ্যপে ৷
৫) দে ভগৱান
সুব্ৰত কাকতিৰ পৰিচালনাৰে জনপ্ৰিয় বোলছবি বিদুৰভাইৰ প্ৰথমটো গীত ‘দে ভগৱান’ ৷ বৰ্তমান ডেকাৰ পৰা বুঢ়ালৈকে গুণগুণাই থকা এই গীতটিৰে আপুনিও আজিৰ নিশা জীপাল কৰি ৰাখিব পাৰে ৷ গীতটিত কণ্ঠদান কৰিছে দীক্ষু শৰ্মাই, সুব্ৰত কাকতিৰ কথা আৰু সংগীত প্ৰনয় দত্তৰ ৷
নৱবৰ্ষৰ বাবে আপুনি বিশাল অনুষ্ঠানৰেই আয়োজন কৰক বা অন্তৰংগ সমাৱেশৰে আয়োজন কৰক, এই গীতসমূহৰ সৈতে সকলোৱে মিলি এটা অবিস্মৰণীয় সন্ধিয়া উদযাপন কৰিব পাৰিব ।
Continue Reading
