ডিজিটেল ডেস্কঃ আজি অৰ্থাৎ ৩ ছেপ্টেম্বৰত ব্ৰুনাইত উপস্থিত হ’ল প্ৰধানমন্ত্ৰী নৰেন্দ্ৰ মোডী। ব্ৰুনাইৰ চুলতান হাজী হাছানাল ব’ল্কিয়াৰ আমন্ত্ৰণ ৰক্ষা কৰিলে প্ৰধানমন্ত্ৰী মোদীয়ে। চুলতান হাছানাল ব’ল্কিয়াক বিশ্বৰ ভিতৰতে ধনী বুলি গণ্য কৰা হয় আৰু এই দেশখন তৈলক্ষেত্ৰৰ বাবে পৰিচিত। ইয়াৰ মুঠ জনসংখ্যা প্ৰায় ৪.৫ লাখ।
১৯৮৪ চনত যুক্তৰাজ্যৰ দাসত্বৰ পৰা স্বাধীন হোৱা ব্ৰুনাই দেশৰ বাঘজৰী চুলতান হাছানাল ব’ল্কিয়াৰ হাতত। তেওঁৰ সম্পূৰ্ণ নাম হ’ল হাছানাল ব’ল্কিয়া ইবনি ওমৰ আলী ছাইফুদ্দিন তৃতীয়, যাৰ বয়স প্ৰায় ৭৮ বছৰ। বিলাসী জীৱনশৈলীৰ বাবে বিশ্বজুৰি পৰিচিত হাছানাল ব’ল্কিয়া।
এক প্ৰতিবেদন অনুসৰি হাছানাল ব’ল্কিয়াই বিলাসী ৰাজপ্ৰসাদত বাস কৰে আৰু তেওঁৰ সম্পত্তিৰ পৰিমাণ ট্ৰিলিয়নৰো অধিক । হাছানাল ব’ল্কিয়াৰ ওচৰত আছে শ শ গাড়ী। ইয়াৰ উপৰিও তেওঁৰ নিজাকৈ বয়িং ৭৪৭ বিমান আছে। যাৰ দাম হাজাৰ কোটি টকা। তেওঁৰ ব্যক্তিগত জেটখন জলীয় সোণেৰে ৰং কৰা হৈছে। ইয়াত ৯৮৯ হাজাৰ কোটি টকা ব্যয় কৰা হৈছে।
কেৱল এয়াই নহয়, হাছানাল ব’ল্কিয়াৰ হাতত আছে ৫০০ খন ৰ’লছ ৰয়েচ গাড়ী আৰু ৩০০ খন ফেৰাৰী গাড়ী। ইয়াৰ উপৰিও বয়িং ৭৬৭- ২০০, এয়াৰ বেছ এ৩৪০- ২০০ আৰু দুখন ছিকোৰস্কি হেলিকপ্টাৰ আছে। যিকোনো ঠাইলৈ যাবলৈ তেওঁ ব্যৱহাৰ কৰে। চুলতানৰ ৰাজপ্ৰসাদত ৫টা চুইমিং পুল, ২৫৭টা বাথৰুম আৰু ১৭০০ৰো অধিক কোঠা আছে। ১১০টা গেৰেজৰ উপৰিও ২০০টা ঘোঁৰাৰ ফাৰ্ম আছে য’ত এয়াৰ কণ্ডিচনাৰ আছে। এই ৰাজপ্ৰসাদৰ গম্বুজটো ২২ কেৰেট সোণেৰে সজাই তোলা হৈছে।
হাছানাল ব’ল্কিয়াৰ ঘৰখনৰ নাম নুৰুল ইমান পেলেচ। দেশে স্বাধীনতা লাভ কৰাৰ পিছত ১৯৮৪ চনত নিৰ্মাণ কৰা হৈছিল। ইয়াৰ নাম গিনিজ বুক অৱ ৱৰ্ল্ড ৰেকৰ্ডত সৰ্ববৃহৎ ৰাজপ্ৰসাদ হিচাপে অন্তৰ্ভুক্ত কৰা হৈছে। এই ৰাজপ্ৰসাদটো ২০ লাখ বৰ্গফুট এলেকাত নিৰ্মাণ কৰা হৈছে। এক প্ৰতিবেদন অনুসৰি হাছানাল বলকিয়াৰ ইস্তানা নুৰুল ইমান পেলেচৰ মূল্য ২৫৫০ কোটিৰো অধিক বুলি অনুমান কৰা হৈছে।
Continue Reading
