পুনৰ বিশ্বৰ জনপ্ৰিয় নেতাৰ শীৰ্ষত নৰেন্দ্ৰ মোদী; তালিকাৰ একেবাৰে তলত ফ্ৰান্সৰ ৰাষ্ট্ৰপতি

ডিজিটেল ডেস্ক : ভাৰতৰ প্ৰধানমন্ত্ৰী নৰেন্দ্ৰ মোদীয়ে পুনৰ বিশ্বৰ আটাইতকৈ জনপ্রিয় গণতান্ত্রিক নেতা ৰূপে স্বীকৃতি লাভ কৰিছে। আমেৰিকাস্থিত ডাটা বিশ্লেষক প্রতিষ্ঠান 'মর্নিং কনছাল্ট'-এ শেহতীয়াকৈ বিশ্বজুৰি চলোৱা সমীক্ষাত ৬৮ শতাংশ অনুমোদন বা সমর্থন ৰেটিং লাভ কৰি মোদীয়ে বিশ্বৰ জনপ্রিয় নেতাৰ তালিকাত শীর্ষস্থান লাভ কৰিছে। তেওঁৰ বিৰুদ্ধে ২৬ শতাংশই অসন্মতি প্রকাশ কৰে। 

'গ্ল'বেল লীডাৰ এপ্রভেল ৰেটিং ট্ৰেকাৰ'ৰ তথ্য মতে, 'দেশত জনপ্রিয়তা' আৰু 'বর্ধিত আন্তঃৰাষ্ট্ৰীয় স্বীকৃতি'য়ে মোদীক উল্লেখনীয়ভাবে বিশ্বৰ আন বৃহৎ অর্থনীতিৰ দেশবোৰৰ নেতাতকৈ তেওঁক আগস্থানত ৰাখিছে। এই সমীক্ষাত ছুইজাৰলেণ্ডৰ ৰাষ্ট্ৰপতি গাই পাৰমেলিন আৰু দক্ষিণ কোৰিয়াৰ ৰাষ্ট্ৰপতি লী জে-মিয়ুং দুয়োজনকে ৬২ শতাংশ অনুমোদন ৰেটিঙেৰে দ্বিতীয় স্থানত ৰখা হৈছে। এই শেহতীয়া অনুমোদন ৰেটিং মাৰ্চৰ ২-ৰ পৰা মাৰ্চৰ ৮ তাৰিখলৈ সংগ্ৰহ কৰা তথ্যৰ ভিত্তিত কৰা হৈছে। এই সমীক্ষাত প্রধানমন্ত্রী মোদী আৰু পাশ্চাত্যৰ বিশিষ্ট নেতাসকলৰ ৰেটিঙৰ মাজত যথেষ্ট ব্যৱধান দেখা গৈছে। 

আমেৰিকাৰ ৰাষ্ট্ৰপতি ড'নাল্ড ট্রাম্পৰ অনুমোদন ৰেটিং হৈছে ৩৯ শতাংশ। আনহাতে, ব্রিটেইনৰ প্ৰধানমন্ত্ৰী কিয়াৰ ষ্টাৰ্মাৰ অনুমোদন ৰেটিং হৈছে ২৪ শতাংশ। তালিকাৰ একেবাৰে তলৰ ফালে থকা অন্যতম নেতা হৈছে ফ্ৰান্সৰ ৰাষ্ট্ৰপতি ইমানুৱেল মেক্ৰন। তেওঁৰ অনুমোদন ৰেটিং ১৭ শতাংশ আৰু অসন্মতি ৰেটিং ৭৫ শতাংশ। উল্লেখযোগ্য যে ২০২৪ চনৰ মে'ত তৃতীয়বাৰৰ বাবে প্ৰধানমন্ত্ৰীৰূপে দায়িত্ব গ্রহণ কৰা মোদীয়ে একেৰাহে বহু দিন এই জনপ্ৰিয়তাৰ তালিকাৰ শীৰ্ষস্থানত আছে।

উৎসঃ দৈনিক জনমভূমি