ডিজিটেল ডেস্কঃ নিজৰ দেহত অলৌকিক শক্তি থকা বুলি দাবী কৰিলে এজন যুৱকে। সেই কথা সহপাঠীসকলক প্ৰমাণ কৰি দেখুৱাবলৈ পঞ্চম মহলাৰ পৰা জঁপিয়ালে যুৱকজনে।
তেওঁৰ ‘অতিপ্ৰাকৃতিক’ শক্তি আছে বুলি সহপাঠীসকলক কেইবাবাৰো ক’লে। এইবাৰ সেই শক্তি প্ৰমাণ কৰিবলৈ যুৱকজনে হোষ্টেলৰ পাঁচ মহলাৰ পৰা জঁপিয়াই দিলে। গুৰুতৰভাৱে আঘাতপ্ৰাপ্ত যুৱকজনক ততাতৈয়াকৈ চিকিৎসালয়ত ভৰ্তি কৰোৱা হয়।
চিকিৎসকে জনোৱা মতে, যুৱকজনৰ হাত-ভৰি ভাঙি গৈছে। মূৰত গুৰুতৰভাৱে আঘাত পাইছে। সোমবাৰে সন্ধিয়া তামিলনাডুৰ কইম্বাটুৰৰ এখন অভিযান্ত্ৰিক মহাবিদ্যালয়ত সংঘটিত হয় এই ঘটনা।
আৰক্ষীৰ সূত্ৰ অনুসৰি আহত যুৱকজনৰ নাম এ প্ৰভু। বিটেকৰ তৃতীয় বৰ্ষৰ ছাত্ৰ। হোষ্টেলৰ সহপাঠীৰ পৰা আৰক্ষীয়ে জানিব পাৰিলে যে প্ৰভুৱে প্ৰায়ে তেওঁলোকক কৈছিল যে তেওঁৰ ‘অলৌকিক’ ক্ষমতা আছে। আৰু সেই শক্তিৰে তেওঁ যিকোনো ওখ ঠাইৰ পৰা জঁপিয়াই পৰিব পাৰে। তেওঁ দাবী কৰিছিল যে তেওঁ জঁপিয়াই দিলেও তেওঁৰ একো নহ’ব। সহপাঠীসকলে তেওঁৰ কথাবোৰ বিশ্বাস কৰিবলৈ ইচ্ছা কৰা নাছিল। কিন্তু প্ৰভুৱে নিজৰ শক্তি প্ৰমাণ কৰিবলৈ উঠিপৰি লাগিছিল।
আৰক্ষীয়ে এই কথাও জানিব পাৰিলে যে প্ৰভুৱে সহপাঠীসকলক দাবী কৰিছিল যে তেওঁ তান্ত্ৰিক মন্ত্ৰৰ সহায়ত এই ‘অলৌকিক’ শক্তি লাভ কৰিছে। সোমবাৰে সন্ধিয়া ৬:৩০ মান বজাত প্ৰভু হোষ্টেলৰ পঞ্চম মহলালৈ যায়। আৰু বহুতো যুৱক আছিল তাত। তেওঁলোকে নিজৰ মাজতে কথা পাতি আছিল। হঠাৎ সকলোৰে সন্মুখত প্ৰভুৱে পঞ্চম মহলাৰ পৰা জপিয়াই দিয়ে। প্ৰভুৰ এই কাণ্ডত তেওঁৰ সহপাঠীসকল আতংকিত হৈ পৰে। গুৰুতৰভাৱে আঘাতপ্ৰাপ্ত এ প্ৰভুক উদ্ধাৰ কৰি চিকিৎসালয়ত ভৰ্তি কৰোৱা হয়।
Continue Reading
