ডিজিটেল ডেস্কঃ নিহত আল কায়দাৰ নেতা ওছামা বিন লাডেনৰ দেহৰক্ষীৰ মুৰব্বী হিচাপে তেওঁৰ নাম বিগত সময়ত চৰ্চিত হৈ আহিছে। এইবাৰ আল কায়দাৰ নেতা আমিন মহম্মদ উল হক ছাম খানক পাকিস্তান আৰক্ষীৰ কাউণ্টাৰ টেৰৰিজম স্কোয়াডে (চিটিডি) গ্ৰেপ্তাৰ কৰে।
চৰকাৰী সূত্ৰ অনুসৰি ৰাষ্ট্ৰসংঘৰ নিৰাপত্তা পৰিষদৰ "সন্ত্রাসবাদী" তালিকাত নাম অন্তৰ্ভুক্ত হোৱা আমিনক চোৰাংচোৱা তথ্যৰ ভিত্তিত পঞ্জাৱ প্ৰদেশৰ পৰা গ্ৰেপ্তাৰ কৰা হৈছে। পঞ্জাৱ আৰক্ষীৰ সন্ত্ৰাসবাদ বিৰোধী শাখাই দাবী কৰে যে তেওঁ তাত ভেঙুচালিৰ পৰিকল্পনাত জড়িত আছিল। চিটিডিৰ তথ্য অনুসৰি আমিনৰ বিৰুদ্ধে সন্ত্ৰাসবাদৰ সৈতে জড়িত থকাৰ বাবে গোচৰ ৰুজু কৰা হৈছে।
২০১১ চনৰ ২ মে’ত পাকিস্তানৰ এবটাবাদৰ এটা বাংলোত আমেৰিকাৰ নৌসেনাৰ ছিল কমাণ্ডো দল ‘টিম ছয়’ৰ দ্বাৰা বিন লাডেনক হত্যা কৰা হৈছিল। তেওঁৰ মৃতদেহ সাগৰত পুতি থোৱা হৈছিল। বিন লাডেনৰ ঘনিষ্ঠ আমিন নেভি ছিলৰ অভিযানৰ সময়ত সেই এবটাবাদ বাংলোটোত নাছিল। সেই সময়ত তেওঁৰ নামো ‘সম্ভাৱ্য বিশ্বাসঘাতক’ৰ তালিকাত আহিছিল।
চিডিটিৰ তথ্য অনুসৰি বন্দী আল কায়দাৰ নেতাগৰাকীয়ে আফগানিস্তানত থকা তালিবান যোদ্ধাসকলক অবৈধভাৱে অস্ত্ৰ যোগান ধৰাৰ অভিযোগো উত্থাপন হৈছে। প্ৰসংগক্ৰমে ইয়াৰ পূৰ্বে ২০২২ চনৰ জুলাই মাহত আল কায়দাৰ শীৰ্ষ নেতা হিচাপে লাডেনৰ উত্তৰাধিকাৰী আয়মান আল জাৱাহিৰী আফগানিস্তানৰ কাবুলত আমেৰিকাৰ ড্ৰ’ন আক্ৰমণত নিহত হৈছিল।
Continue Reading
