অসমৰ ৰাজনৈতিক আৰু আইন ক্ষেত্ৰৰ এক চিনাকি নাম, প্ৰাক্তন মন্ত্ৰী তথা জ্যেষ্ঠ অধিবক্তা আব্দুল মহিব মজুমদাৰৰ আজি পুৱা গুৱাহাটীত দেহাৱসান ঘটে। মৃত্যুৰ সময়ত তেওঁৰ বয়স আছিল ৯০ বছৰ। গুৱাহাটী চিকিৎসা মহাবিদ্যালয় হাস্পতাল (GMCH)-ত পুৱা প্ৰায় ৮.৪৫ বজাত তেওঁ শেষ নিশ্বাস ত্যাগ কৰে। যোৱা ছেপ্টেম্বৰ মাহৰ পৰা তেওঁ হাস্পতালখনত চিকিৎসাধীন হৈ আছিল।
১৯৩২ চনৰ ২০ আগষ্টত হাইলাকান্দি চহৰত জন্মগ্ৰহণ কৰা মজুমদাৰে অসমৰ ৰাজনীতিত এক সুকীয়া স্থান দখল কৰিছিল। তেওঁ হাইলাকান্দি সমষ্টিৰ পৰা কেইবাবাৰো বিধায়ক হিচাপে নিৰ্বাচিত হৈছিল। ১৯৮৩ চনৰ পৰা ১৯৯১ চনলৈ, পুনৰ ১৯৯৬ চনত আৰু শেষবাৰৰ বাবে ২০১১ চনত তেওঁ বিধায়ক হিচাপে কাৰ্যনিৰ্বাহ কৰিছিল। ইয়াৰ উপৰিও, তেওঁ অসম চৰকাৰৰ কেবিনেট মন্ত্ৰী হিচাপেও গুৰুত্বপূৰ্ণ দপ্তৰৰ দায়িত্ব বহন কৰি ৰাজ্যৰ উন্নয়নত অৰিহণা যোগাইছিল।
আইনী জগততো আব্দুল মহিব মজুমদাৰৰ এক সুকীয়া পৰিচয় আছিল। তেওঁ আই.এম.ডি.টি. (IMDT) আইনৰ মূল স্থপতি হিচাপে পৰিচিত। তেওঁৰ পিতৃ আব্দুল মট্লিব মজুমদাৰ এগৰাকী স্বাধীনতা সংগ্ৰামী আছিল।
প্ৰাক্তন মন্ত্ৰীগৰাকীৰ নশ্বৰ দেহ গুৱাহাটী চিকিৎসা মহাবিদ্যালয় হাস্পতালৰ পৰা তেওঁৰ হাতীগাঁওস্থিত বাসভৱনলৈ লৈ যোৱা হ'ব আৰু আজি দিনটোৰ ভিতৰতে তেওঁৰ শেষ কৃত্য সম্পন্ন কৰা হ'ব বুলি পৰিয়ালৰ সূত্ৰে প্ৰকাশ। আব্দুল মহিব মজুমদাৰৰ মৃত্যুত অসমৰ ৰাজনৈতিক আৰু সামাজিক ক্ষেত্ৰত গভীৰ শোকৰ ছাঁ পৰিছে।
Continue Reading
