ডিজিটেল ডেস্কঃ দীপাৱলী শেষ হোৱাৰ লগে লগে আৰম্ভ হয় ষঠ পূজাৰ প্ৰস্তুতি। ছট পূজা বা ষঠ পূজা এক প্ৰাচীন ভাৰতীয় বৈদিক উৎসৱ। ষঠ পূজা ভাৰতীয় উপমহাদেশৰ বিহাৰ, ঝাৰখণ্ড, ওড়িশা, পশ্চিম বংগৰ লগতে নেপালৰ মধেশ অঞ্চলৰ স্থানীয় উৎসৱ। প্ৰতি বছৰে কাৰ্তিক শুক্ল পক্ষৰ ষষ্ঠী তিথিত ষঠ পূজা অনুষ্ঠিত কৰা হয়। উত্তৰ ভাৰতৰ অন্যতম জনপ্ৰিয় উৎসৱ ষঠ পূজা ঘাইকৈ বিহাৰ, উত্তৰ প্ৰদেশ আদিত পালন কৰা হয় যদিও আজিকালি প্ৰায় সকলো ঠাইতে ইয়াৰ উদযাপন কৰা দেখা যায়। বহু মানুহ এই দিনটো উপবাসে থাকে। এইবাৰ ষঠ পূজা উদযাপন হব ৩০ অক্টোবৰত।
এই সময়ত মহিলাসকলে ব্ৰত পালন কৰি পৰিয়ালৰ লোকসকলৰ সমৃদ্ধি, সফলতা আৰু কল্যাণৰ বাবে ভগৱান সূৰ্যৰ ওচৰত প্ৰাৰ্থনা কৰে। শক্তিৰ দেৱতা ভগৱান সূৰ্য্যক আৰাধনা কৰিবলৈ ষঠ পূজা পালন কৰা হয়। ভগৱান সূৰ্যৰ পূজা কৰিলে সকলো ৰোগ নাশ হয় বুলি বিশ্বাস কৰা হয়। কিন্তু এই সময়ত ব্ৰত পালন কৰা সকলে কিছুমান কথাত বিশেষ যত্ন লোৱা উচিত।
আশীৰ্বাদঃ ষঠ পূজাৰ সময়ত কোনো শুভ অনুষ্ঠানত ভাগ লোৱাৰ আগতে স্নান কৰিব লাগিব। এই সময়ত আপোনাৰ পৰিয়ালৰ জ্যেষ্ঠজনৰ আশীৰ্বাদ লওক। দেহটো ভালদৰে পৰিষ্কাৰ কৰি অৰ্থাৎ হাত ভৰি ধোৱাৰ পিছতহে ভোগ বা প্ৰসাদ বনাব লাগে।
ব্ৰত কথাঃ ভগৱান সূৰ্যক গাখীৰ আৰু পানী অৰ্পণ কৰক। ভালদৰে পূজা কৰক। নিশাৰ সময়ত ব্ৰত কথা শুনিবলৈ নাপাহৰিব। ব্ৰতৰ শেষত চৰ্বত খাই ষঠ পূজাত আগবঢ়োৱা প্ৰসাদ সেৱন কৰিব পাৰিব।
গা ধোৱাঃ সূৰ্য্য দেৱতাক পূজা কৰাৰ আগতে কেতিয়াও প্ৰসাদ সেৱন নকৰিব। স্নান নকৰাকৈ পূজা-পাতলৰ বাবে নিৰ্মিত যিকোনো বস্তু স্পৰ্শ কৰাৰ পৰা বিৰত থাকক। ষঠ পূজাৰ দিনটোত নিৰামিষ খাদ্য সেৱন কৰিব। ইয়াৰ লগতে সুৰাপান বা ধূমপান নকৰিব।
নিমখঃ ভগৱান সূৰ্য্যলৈ আগবঢ়োৱা প্ৰসাদত সাধাৰণ নিমখ ব্যৱহাৰ নকৰিব আৰু লগতে হালধি আৰু পিয়াঁজ খোৱাৰ পৰা বিৰত থাকক। পূজাৰ বাবে সদায় নতুন টোপোলা ব্যৱহাৰ কৰক। গোটেই সময়খিনিত কাকো গালি-গালাজ নাপাৰিব, খং নকৰিব।
Continue Reading
