সিদ্ধাৰ্থ শুক্লাৰ মৃত্যুৱে সৃষ্টি কৰিছে যিবোৰ প্ৰশ্নবোধকৰ...

মুম্বাই : বিগ বছ-১৩ বিজেতা সিদ্ধাৰ্থ শুক্লাৰ মৃত্যুৰ বাতৰিৰ পাছতে এতিয়া শোকস্তব্ধ অনুৰাগী৷ কোনো পধ্যেই মানি ল'ব নোখোজা সিদ্ধাৰ্থৰ মৃত্যুৰ বতৰাক লৈ এতিয়া চলিছে নানা বতৰা৷ 'বালিকা বধু'ৰ জৰিয়তে জনপ্ৰিয় হোৱা সিদ্ধাৰ্থ শুক্লাই 'বিগ বছ ছিজন-১৩'ৰ উপৰি 'খতৰো কা খিলাড়ী'ৰ সপ্তম ছিজনতো নাম ৰাখিবলৈ সক্ষম হৈছিল। খবৰ অনুসৰি বুধবাৰে নিশা শোৱাৰ আগত সিদ্ধাৰ্থই এক ঔষধ সেৱন কৰিছিল আৰু তাৰ পাছতেই তেওঁ সাৰ পোৱা নাছিল। ইয়াৰ পাছত তেওঁক আজি চিকিৎসালয়লৈ লৈ যোৱা হয় যদিও চিকিৎসকে হৃদযন্ত্ৰৰ ক্ৰিয়া বন্ধ হৈ মৃত্যু হোৱা বুলি পৰিয়ালৰ লোকক জানিবলৈ দিয়ে ।

মাত্ৰ ৪০ বছৰ বয়সতে মৃত্যু হোৱা সিদ্ধাৰ্থ শুক্লাই তেওঁৰ মাতৃ আৰু দুগৰাকী ভনীয়েকক এৰি থৈ যায়। স্বাস্থ্যৰ প্ৰতি সদা সচেতন এগৰাকী অভিনেতা হিচাপে জনাজাত আছিল সিদ্ধাৰ্থ । শাৰীৰিক চৰ্চা তেওঁৰ নিয়মীয়া অভ্যাস আছিল৷ সাধাৰণ ঔষধ সেৱন কৰিয়েই কেনেকৈ এনেদৰে এগৰাকী স্বাস্থ্য সচেতন ব্যক্তিৰ মৃত্যু হ'ব পাৰে তাকে লৈয়ো এতিয়া বহুজনৰ মাজত প্ৰশ্নৰ উত্থাপন হৈছে।

উল্লেখ্য যে 'বিগ বছ-১৩'ৰ জৰিয়তে জনপ্ৰিয় হোৱা দেৱলীনা ভট্টাচাৰ্যই যোৱাবছৰৰ এপ্ৰিল মাহত মুম্বাই আৰক্ষীৰ ওচৰত এখন এজাহাৰ দাখিল কৰিছিল । উক্ত এজাহাৰখনত তেওঁ আৰু বিগ বছ-১৩ৰ বিজেতা সিদ্ধাৰ্থ শুক্লাই মৃত্যুৰ ভাবুকি পোৱা বুলি আৰক্ষীক অৱগত কৰিছিল। এই ক্ষেত্ৰত মুম্বাই আৰক্ষীৰ সহায় বিচাৰিছিল দেৱলীনাই । কেৱল দেৱলীনা আৰু সিদ্ধাৰ্থকেই মৃত্যুৰ ভাবুকি দিয়া হোৱা নাছিল, ভাবুকি দিয়া হৈছিল বিগ বছ খ্যাত ৰশ্মি দেশাইকো । সেয়ে সিদ্ধাৰ্থৰ আজিৰ মৃত্যুৰ ঘটনাৰ সৈতে এই ভাবুকিৰ সম্পৰ্ক থাকিব পাৰে বুলি সন্দেহ কৰা হৈছে ।