ডিজিটেল ডেস্কঃ কিছুদিন পূৰ্বে ভাৰতৰ এগৰাকী যুৱকে কুকুৰ এজনীক সামাজিক ভাবে বিয়া পাতি চৰ্চালৈ আহিছিল। এইবাৰ বিয়াৰ পাত্ৰী কুকুৰ নহয়, কুকুৰতকৈও ভয়ংকৰ প্ৰাণী এজনী ঘঁৰিয়ালহে। ঘঁৰিয়াল বিয়া পতা যুৱক জন শিক্ষিত। কেৱল শিক্ষিতই নহয়, তেওঁ এখন চহৰৰ মেয়ৰৰ দৰে উচ্চ পদবীতো অধিষ্ঠিত হৈ আছে।
সেইগৰাকী মেয়ৰেই বিয়া পাতিলে এজনী ঘঁৰিয়ালক। তাকো সম্পূৰ্ণ সামাজিক ৰীতি-নীতিৰে। বিবাহ অনুষ্ঠানত কইনাই পিন্ধা বগা গাউন পিন্ধি ইফালে সিফালে চাই আছে কইনাৰূপী ঘঁৰিয়ালে। স্থানীয় লোকসকলে প্ৰাণ ঢালি নাচিছিল আৰু বিয়াৰ সম্পূৰ্ণ আনন্দ লৈছিল।
তেওঁলোকে বেণ্ডপাৰ্টী বজাই দৰা আৰু কইনাৰ বেশত থকা ঘঁৰিয়ালক আদৰণি জনাইছিল। বিয়া সম্পন্ন হোৱাৰ পিছতে দৰাই কইনাক চুমা খাইছিল। ঘঁৰিয়ালৰ সৈতে বিয়া পতাৰ ঘটনাটো ঘটিছে মেক্সিকোত। মেক্সিকোৰ চান পেড্ৰোৰ মেয়ৰে ঘঁৰিয়ালৰ সৈতে বিবাহপাশত আৱদ্ধ হৈছে।
'কইনা'ৰূপী ঘঁৰিয়াল জনীৰ নাম ৰখা হৈছে লিটল প্ৰিন্সেছ । বিয়া খন হৈ যোৱাৰ পিছতে এলিয়া নামৰ এগৰাকী মহিলাক লিটল প্ৰিন্সেছৰ চোৱাচিতা কৰিবলৈ নিযুক্ত কৰা হৈছে।
কিন্তু ইমান অদ্ভুত বিয়া কিয় সম্পন্ন হ’ল?চহৰ খনত সঁচাকৈয়ে বিবাহযোগ্য ছোৱালীৰ অভাৱ হৈছে নেকি? দৰাচলতে তেনে কোনো কথা নহয়। মেক্সিকোৰ চান পেড্ৰো চহৰৰ পৰম্পৰা অনুসৰি ঘঁৰিয়ালৰ সৈতে বিয়া পাতিব পৰাটো সৌভাগ্যৰ কথা। ঘঁৰিয়ালক উৰ্বৰতাৰ প্ৰতীক হিচাবে চহৰ খনৰ লোকসকলে মানি আহিছে।
মানুহৰ সৈতে প্ৰকৃতিৰ মিলনৰ ইয়াক এক অপূৰ্ব চিন হিচাবেও গণ্য কৰা হয়। যাতে পৰ্যাপ্ত বৰষুণ হয় আৰু খেতি ভাল হয় তাৰ বাবেই চহৰ খনৰ বহু লোকে ঘঁৰিয়ালৰ সৈতে বিয়া পাতি আহিছে।
মেক্সিকোৰ এই অঞ্চলৰ বাসিন্দাসকলে পুৰণি পৰম্পৰা এতিয়াও বচাই ৰাখিছে। পৰম্পৰা ৰক্ষাৰ বাবেই চহৰ খনৰ মেয়ৰগৰাকীয়েও ঘঁৰিয়ালৰ সৈতে বিয়া পাতি ন-কইনাক চুম্বন কৰিছে,একেলগে ফটোও উঠিছে।
Continue Reading
