আন্তঃৰাষ্ট্ৰীয় অলিম্পিয়াডত ভাৰতীয় শিক্ষার্থী দলৰ চমক

ডিজিটেল ডেস্ক: দুসপ্তাহতকৈ কম সময়ৰ ভিতৰত দুটা ভাৰতীয় হাইস্কুলৰ শিক্ষাৰ্থীৰ দলে আন্তঃৰাষ্ট্ৰীয় ৰসায়ন আৰু জীৱবিজ্ঞান অলিম্পিয়াডত চমকপ্রদ প্রদর্শন কৰিবলৈ সক্ষম হয়। উজবেকিস্তানত অনুষ্ঠিত ৫৮ সংখ্যক ৰয়াসন বিজ্ঞান অলিম্পিয়াডত ভাৰতীয় শিক্ষাৰ্থীৰ দলটোৱে ৪টা সোণৰ পদক অর্জন কৰে। 

দেৱদত্ত প্রিয়দর্শিনী (ভুৱনেশ্বৰ), হৰ্ষিত সিংঘল (মান্দি গোবিন্দগড), কবীৰ চিল্লাৰ (দিল্লী) আৰু সন্দীপ কোচি (হায়দৰাবাদ) এই অলিম্পিয়াডত ভাৰতৰ হৈ অংশগ্ৰহণ কৰি সোণৰ পদক অর্জন কৰে। 

আনহাতে, ৩৭ সংখ্যক আন্তঃৰাষ্ট্ৰীয় জীৱবিজ্ঞান অলিম্পিয়াডত লিথুৱানিয়াত ভাৰতীয় দলটোৰ চাৰিজন শিক্ষার্থীৰ এজনে সোণৰ আৰু তিনিজনে ৰূপৰ পদক লাভ কৰে। প্রধানমন্ত্রী নৰেন্দ্ৰ মোদীয়ে সফলতা লাভ কৰা ভাৰতীয় শিক্ষার্থীসকলক অভিনন্দন জ্ঞাপন কৰে আৰু কয় যে এই যুৱ শিক্ষার্থীসকলে ভাৰতলৈ গৌৰৱ কঢ়িয়াই আনিছে।