ডিজিটেল ডেস্কঃ ভাৰতৰ ভিতৰত সপ্তাহত সর্বাধিক সময় কাম কৰে গুজৰাটৰ লোকসকলে। আনহাতে গোৱাৰ লোকসকলে কম সময় কাম কৰিলেও আর্থিকভাৱে যথেষ্ট আগত আছে। গোৱাৰ লোকসকলে 'স্মার্ট ৱৰ্ক' নীতি মানি চলে। ৰাজ্যখনৰ লোকসকলে কম সময়ত অধিক কাম কৰে আৰু বাকী সময়ছোৱা নিজৰ জীৱন উপভোগ কৰে।
গোৱাৰ লোকসকলে ইয়াকে প্ৰমাণ কৰি দেখুৱাইছে যে অধিক কাম কৰাটোৱেই যথেষ্ট নহয়, বৰং স্মার্ট উপায়েৰে কাম কৰাটোহে উত্তম। প্ৰধানমন্ত্ৰীৰ অৰ্থনৈতিক উপদেষ্টা পৰিষদে প্রকাশ কৰা এখন প্রতিবেদনৰ পৰা এই কথা জানিব পৰা গৈছে। সপ্তাহত আটাইতকৈ বেছি কাম কৰা ৰাজ্যৰ তালিকাত গুজৰাটে প্রথম স্থান লাভ কৰাৰ বিপৰীতে বিহাৰে তলৰ ফালৰ পৰা প্ৰথম আৰু অসমে তলৰ ফালৰ পৰা দ্বিতীয় স্থান লাভ কৰিছে। বিহাৰৰ মাত্র ১% লোকেহে সপ্তাহত ৭০ ঘণ্টাতকৈ অধিক কাম কৰে। অসমৰ ১.৬%, ঝাৰখণ্ডৰ ২.১% লোকেহে সপ্তাহত ৭০ ঘণ্টাতকৈ অধিক কাম কৰে বুলি প্রতিবেদনখনৰ পৰা জানিব পৰা গৈছে।
চৰকাৰী অধ্যয়নটোৰ পৰা লাভ কৰা তথ্য অনুসৰি গড় হিচাপত প্রতিজন ভাৰতীয়ই সপ্তাহত ৪২.২ ঘণ্টা কাম কৰে। সপ্তাহত ৭০ ঘণ্টাতকৈ অধিক কাম কৰা লোকৰ ক্ষেত্ৰত উত্তৰ ভাৰতৰ লোকসকল যথেষ্ট পাছ পৰি আছে। দিল্লীৰ লোকসকলে প্রতি দিনে কমেও ৮.৩ ঘণ্টা কাম কৰে। গোৱাৰ লোকসকলে গড় হিচাপত দৈনিক ৫.৫ ঘণ্টা কাম কৰে। অসমকে ধৰি উত্তৰ-পূৰ্বাঞ্চলৰ ৰাজ্যসমূহৰ লোকসকলে গড় হিচাপত প্রতিদিনে ৬ ঘণ্টা কাম কৰে। উল্লেখযোগ্য যে সপ্তাহত ৭০ ঘণ্টা বা তাতকৈ অধিক কাম কৰাৰ অৰ্থ হ'ল ছদিনত গড় হিচাপত প্রতিদিনে ১১ ঘণ্টাতকৈ অধিক কাম কৰা। আনহাতে ৭০ ঘণ্টাতকৈ অধিক কাম কৰা সৰ্বাধিক সাত শতাংশ লোক আছে গুজৰাটত। পঞ্জাবৰ লোকসকলেও সপ্তাহত ৭০ ঘণ্টা পর্যন্ত কাম কৰে।
ৰাজ্যখনৰ সাত শতাংশ লোকে ৭০ ঘণ্টাতকৈ অধিক কাম কৰে। আনহাতে মহাৰাষ্ট্ৰৰ ৬.৬%, পশ্চিম বংগৰ ৬.২% আৰু কেৰালাৰ ৬.১% লোকে এসপ্তাহত ৭০ ঘণ্টাতকৈ অধিক সময় কাম কৰে। ইফালে দেশৰ গড় অনুসৰি নগৰাঞ্চলত বাস কৰা লোকসকলে প্রতিদিনে ৭.৮ ঘণ্টা আৰু গ্রামাঞ্চলৰ লোকসকলে প্রতিদিনে ৬.৭ ঘণ্টা কাম কৰে। উত্তৰাখণ্ড, পঞ্জাব আৰু ঝাৰখণ্ডৰ গ্রামাঞ্চলৰ লোকসকলে আটাইতকৈ বেছি সময় কাম কৰে। অসম, নগালেণ্ড আৰু গোৱাৰ লোকসকলে আটাইতকৈ কম কাম কৰে।
উৎস- দৈনিক জনমভূমি
Continue Reading
