শাসক লেবাৰ পাৰ্টিৰ ৰাজনৈতিক বিপর্যয়, গাদী হেৰুৱাব পাৰে ব্রিটেইনৰ প্ৰধানমন্ত্ৰী ষ্টাৰ্মাৰে

ডিজিটেল ডেস্ক: ব্রিটেইনৰ ৰাজনৈতিক অস্থিৰতা দূৰ কৰাৰ লক্ষ্যৰে ২০২৪ চনত দেশখনৰ শাসনলৈ অহা প্রধানমন্ত্রী কেইৰ ষ্টাৰ্মাৰৰ বিৰুদ্ধে এতিয়া ৰাজনৈতিক বতাহ বলিছে। দেশখনৰ কেইবাটাও নিৰ্বাচনত 'লেবাৰ পার্টি'ৰ শোচনীয় পৰাজয়ৰ পাছত নিজ দলৰেই বহুকেইজন সাংসদে তেওঁক পদত্যাগৰ দাবী জনাইছে। 

ইংলেণ্ডৰ কাউন্সিলৰ নিৰ্বাচনৰ লগতে স্কটলেণ্ড আৰু ৱেলছৰ যোৱা সপ্তাহৰ বিধানসভা নির্বাচনত প্রধানমন্ত্রী কেইৰ ষ্টাৰ্মাৰৰ 'লেবাৰ পার্টি' পৰাজিত হৈছিল। ইয়াৰ পাছতেই দলৰ প্ৰায় ৭০জন সাংসদে ষ্টাৰ্মাৰৰ পদত্যাগ দাবী কৰিছে। মঙলবাৰে চৰকাৰৰ এখন কেবিনেট বৈঠকৰ পাছতে প্রধানমন্ত্রী ষ্টাৰ্মাৰে কয় যে লেবাৰ পাৰ্টিত দলৰ নেতাক প্রত্যাহ্বান জনোৱাৰ এটা নীতি আছে, কিন্তু বর্তমানলৈকে সেই নিয়ম মানি কাম কৰা হোৱা নাই। 

উল্লেখযোগ্য যে সোমবাৰে প্ৰধানমন্ত্ৰীজনে সংসদত ভাষণ দিয়াৰ পাছতে নিজ দলৰে বহুকেইজন সাংসদে তেওঁক ৰাজহুৱাভাৱে পদত্যাগৰ দাবী জনায়। তদুপৰি ষ্টাৰ্মাৰৰ শাসনত অসন্তুষ্ট এজন মন্ত্ৰী আৰু কেইবাজনো জ্যেষ্ঠ বিষয়াই ইতিমধ্যে পদত্যাগ কৰিছে। ইফালে প্রধানমন্ত্রী ষ্টাৰ্মাৰে কেবিনেটত প্রকাশ কৰিছে যে তেওঁ পদত্যাগ নকৰে। 

উল্লেখযোগ্য যে ষ্টাৰ্মাৰৰ প্রতিদ্বন্দ্বী হিচাপে থিয় দিছে পূৰ্বৰ উপ-প্রধানমন্ত্রী এঞ্জেলা ৰায়নাৰ, স্বাস্থ্য সচিব বেছ ষ্ট্ৰীটিং আৰু গ্ৰেটাৰ মানচেষ্টাৰৰ মেয়ৰ এণ্ডী বার্নহাম।