ইৰানৰ শান্তি প্ৰস্তাৱ প্রত্যাখ্যান ড’নাল্ড ট্রাম্পৰ

ডিজিটেল ডেস্ক : মধ্যপ্রাচ্যৰ যুদ্ধ বন্ধ কৰাৰ বাবে ইৰানে দিয়া শান্তি প্রস্তাৱ অগ্রাহ্য কৰিলে মার্কিন ৰাষ্ট্ৰপতি ড'নাল্ড ট্রাম্পে। আমেৰিকাৰ ৰাষ্ট্ৰপতিজনে ইৰানে দিয়া চৰ্তসমূহ 'কোনোপধ্যে গ্রহণযোগ্য নহয়' বুলি প্রকাশ কৰি পুনৰ যুদ্ধ আৰম্ভ কৰাৰো ইংগিত দিয়ে। দুয়োখন দেশৰ শান্তি আলোচনাত মধ্যস্থতাকাৰীৰ ভূমিকা লোৱা পাকিস্তানৰ জৰিয়তে ইৰানে আমেৰিকালৈ শান্তি প্ৰস্তাৱ প্ৰেৰণ কৰিছিল। 

বাল ষ্ট্ৰীট জার্নেলৰ তথ্য অনুসৰি, ইৰানে দেশখনত থকা বৃহৎ ইউৰেনিয়াম ভাণ্ডাৰৰ এটা অংশ কিছু পাতল কৰি ৰখাৰ লগতে বাকীখিনি বেলেগ দেশলৈ হস্তান্তৰ কৰাৰ প্ৰস্তাৱ দিছিল। লগতে উল্লেখ কৰিছিল যে যদি শান্তি আলোচনা ব্যর্থ হয় বা আমেৰিকাই যদি চুক্তি ভংগ কৰে, তেন্তে ইৰানে অন্য দেশত ৰখা ইউৰেনিয়াম পুনৰ ঘূৰাই আনিব।

কিন্তু ট্রাম্পে ইৰানৰ এই প্রস্তাৱ মানি ল'ব খোজা নাই আৰু ইৰানৰ প্রস্তাৱ কোনোপধ্যে গ্রহণযোগ্য নহয় বুলি 'ট্রুথ ছ'চিয়েল'ত প্রকাশ কৰিছে। পৰৱৰ্তী সময়ত সাংবাদিকৰে বাৰ্তালাপত ড'নাল্ড ট্রাম্পে কয় যে ইৰানৰ ইউৰেনিয়াম ভাণ্ডাৰত আমেৰিকাৰ নিৰীক্ষণ অব্যাহত আছে আৰু কোনো যদি উক্ত স্থানলৈ যোৱা দেখা পাই তাক উৰাই দিয়া হ'ব। 

ইফালে, মার্কিন ৰাষ্ট্ৰপতি ট্রাম্পে পুনৰ যুদ্ধ আৰম্ভ হোৱাৰ ইংগিত দিয়াৰ পাছতে ইৰানী কর্তৃপক্ষই ট্রাম্পক উভতি ধৰিছে। ইৰানে কয় যে যদি আমেৰিকাই পুনৰ দেশখনত আক্রমণ কৰে অথবা হৰমুজ প্রণালীলৈ অধিক যুঁজাৰু জাহাজ প্ৰেৰণ কৰে, তেন্তে তেওঁলোকো মনে মনে বহি নাথাকে। ইৰানেও সমানে প্রত্যাক্রমণ কৰিব বুলি ট্রাম্পক হুংকাৰ দিয়ে।

ইৰানৰ ৰাষ্ট্ৰপতি মাছুদ পেজেস্কিয়ানে কয় যে আমি কেতিয়াও শত্রুপক্ষৰ ওচৰত মূৰ তল কৰিব নোৱাৰোঁ। যুদ্ধ বন্ধ কৰা সন্দৰ্ভত আলোচনা কৰা মানেই আত্মসমর্পণ কৰা নুবুজায় বুলি উল্লেখ কৰি পেজেস্কিয়ানে কয় যে আমেৰিকাই যুদ্ধ বন্ধ কৰাৰ বাবে ইৰানক দিয়া প্রস্তাৱ স্বীকাৰ কৰা আৰু আত্মসমর্পণ কৰা একে কথা। উল্লেখযোগ্য যে ইৰান আৰু আমেৰিকাৰ মাজৰ যুদ্ধই দুমাহ উকলি গ'ল। বর্তমান যুদ্ধ-বিৰতি চলি আছে যদিও ছেগা-চোৰোকাকৈ আক্রমণ-প্রত্যাক্রমণ অব্যাহত আছে।

উৎসঃ দৈনিক জনমভূমি