উত্তৰ প্ৰদেশৰ বুলডজাৰ অভিযানৰ পাৰ্শ্বক্ৰিয়া অব্যাহত; কাইলৈ উচ্চতম ন্যায়ালয়ে গ্ৰহণ কৰিব আবেদন

ডিজিটেল ডেস্ক: কাইলৈ উচ্চতম ন্যায়ালয়ে উত্তৰ প্ৰদেশত বুলডজাৰেৰে চলোৱা উচ্ছেদৰ বিৰুদ্ধে দাখিল কৰা আবেদন গ্ৰহণ কৰিব৷ আৱেদনখন ইছলামিক সংস্থা জমিয়ত উলামা-ই-হিন্দে দাখিল কৰিছিল, যিয়ে বেআইনী ধ্বংসত লিপ্ত বিষয়াসকলৰ বিৰুদ্ধে কঠোৰ ব্যৱস্থা গ্ৰহণ কৰিবলৈও দাবী উত্থাপন কৰিছিল৷

উত্তৰ প্ৰদেশ চৰকাৰে যোৱা সপ্তাহত সংঘৰ্ষত জড়িত থকাৰ অভিযোগত অভিযুক্ত লোকসকলৰ যিকোনো অবৈধ ভৱন ধ্বংস কৰাৰ নিৰ্দেশ দিয়াৰ পিছত আবেদনখন দাখিল কৰা হৈছিল, যাৰ ভিতৰত আছে ভাৰতীয় ৱেলফেয়াৰ পাৰ্টিৰ এজন কৰ্মী জাভেদ মহম্মদৰ ঘৰ।

জাভেদ মহম্মদৰ ঘৰটো দেওবাৰে প্ৰয়াগৰাজৰ জিলা উন্নয়ন কৰ্তৃপক্ষৰ সৈতে উচ্ছেদ কৰা হৈছিল আৰু কৈছিল যে ভৱনটোৰ কিছু অংশ অবৈধভাৱে নিৰ্মাণ কৰা হৈছিল আৰু তেওঁ মে’ মাহত বিষয়টোৰ শুনানিৰ বাবে উপস্থিত হোৱা নাছিল। তেওঁৰ অধিবক্তাসকলে অৱশ্যে কৈছিল যে পৰিয়ালটোৱে উচ্ছেদৰ দুদিন পূৰ্বে শুকুৰবাৰে পলমকৈহে জাননীখনৰ এটা প্ৰতিলিপি পাইছিল, আৰু ভৱনটো তেওঁৰ পত্নীৰ মালিকানাধীন আছিল৷

এদিন আগতে কানপুৰত ৩ জুনৰ হিংসাত্মক ঘটনাৰ মাষ্টাৰমাইণ্ড নিজাম কুৰেছিৰ এজন ঘনিষ্ঠ সহযোগীৰ মালিকানাধীন এটা বহুমহলীয়া অট্টালিকা ভাঙি পেলোৱা হৈছিল। কিছুদিন পূৰ্বে দুগৰাকী ৰাজনৈতিক নেতাই কিছু আপত্তিজনক আৰু আক্ৰমণাত্মক মন্তব্য কৰিছিল যাৰ ফলত দেশৰ বিভিন্ন প্ৰান্তত সাম্প্ৰদায়িক উত্তেজনাৰ সৃষ্টি হৈছিল। দুয়োগৰাকী ৰাজনৈতিক নেতাৰ মন্তব্যৰ প্ৰতিবাদস্বৰূপে কানপুৰ জিলাত বন্ধৰ আহ্বান জনাইছিল৷

উচ্চতম ন্যায়ালয়ত দাখিল কৰা আবেদনত কোৱা হৈছিল যে প্ৰতিবাদৰ দিনটোত হিন্দু আৰু মুছলমান ধৰ্মীয় সম্প্ৰদায়ৰ মাজত কাজিয়া আৰম্ভ হৈছিল আৰু দুয়োটা সম্প্ৰদায়ৰ মাজত শিলগুটি নিক্ষেপৰ দৰে ঘটনা সংঘটিত হৈছিল৷ কানপুৰত সংঘটিত হিংসাত্মক ঘটনাৰ পাছত কৰ্তৃত্বপ্ৰাপ্ত কেইবাজনো ব্যক্তিয়ে সংবাদ মাধ্যমত জনাইছিল যে সন্দেহযুক্ত/অভিযুক্তৰ সম্পত্তি জব্দ কৰা হ’ব আৰু ভাঙি পেলোৱা হ’ব।

আনকি ৰাজ্যখনৰ মুখ্যমন্ত্ৰীয়েও সংবাদ মাধ্যমত কৈছিল যে বুলডজাৰ ব্যৱহাৰ কৰি অভিযুক্ত ব্যক্তিসকলৰ ঘৰ উচ্ছেদ কৰা হ’ব৷ আৰু তাৰ বাবেই উক্ত সংস্থাটোৱে উচ্চতম ন্যায়ালয়ত দাখিল কৰিছিল আবেদন৷