উত্তৰ প্ৰদেশত লোকসভা নিৰ্বাচনত বিজেপিৰ মুখ থেকেচাঃ মুখ্যমন্ত্ৰীৰ চকী হেৰুৱাব নেকি যোগী আদিত্যনাথে?

এই  পৰাজয়ৰ ফলত দলটোৰ ভিতৰতে এতিয়া আৰম্ভ হৈছে ব্যাপক আত্মনিৰীক্ষণ। বহুতে এইবুলিও দাবী কৰিছে যে উত্তৰ প্ৰদেশৰ মুখ্যমন্ত্ৰী যোগী আদিত্যনাথক হয়তো মুখ্যমন্ত্ৰী পদৰ পৰা অপসাৰিত কৰা হ’ব। বিগত দুদিন ধৰি  উত্তৰ প্ৰদেশ বিজেপিৰ দুই জ্যেষ্ঠ নেতাই দলৰ সভাপতি জে পি নাড্ডাক সাক্ষাৎ কৰাৰ পিছতে বিষয়টোৱে  অধিক চৰ্চা লাভ কৰিছে। উত্তৰ প্ৰদেশৰ  উপ মুখ্যমন্ত্ৰী কেশৱ মৌৰ্যই ৪৮ ঘন্টাৰ ভিতৰত দুবাৰকৈ জে পি নাড্ডাক সাক্ষাৎ কৰাৰ বিপৰীতে ৰাজ্যিক বিজেপিৰ সভাপতি ভূপেন্দ্ৰ চৌধুৰীয়ে আজি প্ৰধানমন্ত্ৰী নৰেন্দ্ৰ মোদীক সাক্ষাৎ কৰি দলটোৰ নিৰ্বাচনত পৰাজয়ৰ দায়িত্ব  স্বীকাৰ কৰে। খবৰ অনুসৰি ৰাজ্যিক বিজেপিৰ সভাপতিৰ পদ ত্যাগ কৰিবলৈ চৌধুৰীয়ে প্ৰস্তাৱ আগবঢ়াইছে।তাৰ পিছতে কেন্দ্ৰীয় গৃহমন্ত্ৰী অমিত শ্বাহে প্ৰধানমন্ত্ৰী মোদীক সাক্ষাৎ কৰে। নাড্ডাৰ সৈতে মৌৰ্যৰ সাক্ষাতৰ কিছু সময়ৰ পাছতেই যোগী আদিত্যনাথক অপসাৰণৰ জল্পনা-কল্পনা ৰাজনৈতিক মহলত আৰম্ভ হয়।  আনকি বিৰোধী নেতাসকলেও কয় যে বিজেপিত ক্ষমতাৰ যুঁজখন এতিয়া তীব্ৰতৰ  হৈ পৰিছে।