ডিজিটেল ডেস্কঃ জলবায়ু পৰিৱৰ্তনৰ প্ৰভাৱ সমগ্ৰ বিশ্বৰ লগতে ভাৰততো পৰিছে। ইয়াৰ ফলত দেশত শীতৰ প্রকোপ হ্রাস পোৱাৰ লগতে স্বাভাৱিক গড় তাপমাত্রাও বৃদ্ধি পাইছে।
ভাৰতীয় বতৰ বিজ্ঞান বিভাগ (আই এম ডি)ৰ মতে এইবাৰ দেশত বসন্ত কাল নাহিবও পাৰে। আই এম ডিৰ সঞ্চালক প্রধান ড° মৃত্যুঞ্জয় মহাপাত্রই কয়, 'ফেব্ৰুৱাৰীৰ শেষৰ সপ্তাহ অর্থাৎ ২০ দিনৰ পাছৰ পৰা তাপমাত্রা ইমান বৃদ্ধি পাব যে গ্ৰীষ্মকালৰ দৰে লাগিব।'
উল্লেখযোগ্য যে এই বছৰৰ প্ৰথম মাহটো ইতিহাসৰ আটাইতকৈ গৰম জানুৱাৰী আছিল। জানুৱাৰীত দেশত গড় তাপমাত্রা স্বাভাৱিক অৱস্থাতকৈ ১ ডিগ্রী চেলচিয়াছ অর্থাৎ ১৮.০৪ ডিগ্রী চেলচিয়াছ আছিল।
জানুৱাৰীত দেশত স্বাভাৱিক অৱস্থাতকৈ ৭০% কম বৰষুণ হয়। সাধাৰণতে ফেব্ৰুৱাৰীৰ মাজভাগৰ পৰা এপ্ৰিলৰ প্ৰথম ভাগলৈকে ৪৫-৬০দিন বৰ বেছি ঠাণ্ডাও নহয় গৰমো নহয়। এইসময়ছোৱাকে বসন্ত কাল বুলি কোৱা হয়। এতিয়া বসন্ত কাল দ্রুতগতিত হ্রাস পাইছে। আনহাতে দেশৰ পাহাৰীয়া অঞ্চলত হিমপাত প্রায় ৮০% পর্যন্ত হ্রাস পাইছে। আই এম ডিৰ মতে, উত্তৰ-পশ্চিমৰ পৰা আৰম্ভ কৰি পূব ভাৰতলৈকে এই বছৰ দেশৰ অধিকাংশতে ফেব্ৰুৱাৰীত বৰষুণৰ পৰিমাণ স্বাভাৱিক অৱস্থাতকৈ ২০% হ্রাস পাব। বৰষুণ কম হোৱাৰ ফলত আর্দ্রতা হ্রাস পাব আৰু ইয়াৰ তাপমান দ্রুতগতিত বৃদ্ধি পাব। সাধাৰণতে দেশত ফেব্ৰুৱাৰীত সর্বোচ্চ তাপমাত্রা ৩০-৩২ ডিগ্ৰী চেলচিয়াছৰ ভিতৰত থাকে।
এইবাৰ সৰ্বোচ্চ তাপমাত্রা ৩৩-৩৭ ডিগ্রী চেলচিয়াছ পর্যন্ত হোৱাৰ সম্ভাৱনা আছে বুলি আই এম ডিয়ে প্রকাশ কৰে।
উৎসঃ দৈনিক জনমভূমি
Continue Reading
