ডিজিটেল ডেস্কঃ কেন্দ্ৰীয় ৰে’ল মন্ত্ৰী অশ্বিনী বৈষ্ণৱে সংসদত প্ৰকাশ কৰা অনুসৰি শীঘ্ৰেই ভাৰতীয় ৰে’লৱেত সংযোজন ঘটিব এক নতুন প্ৰযুক্তিৰ। কেন্দ্ৰীয় ৰে’ল মন্ত্ৰীগৰাকীয়ে উল্লেখ কৰা মতে ভাৰতীয় ৰে’লৱেই হাইড্ৰ’জেন চালিত ৰে’ল নিৰ্মাণৰ অত্যাধুনিক প্ৰকল্পৰ কাম দ্ৰুত গতিত আৰম্ভ কৰিছে। ভাৰতীয় ৰে’লখণ্ডত প্ৰথমবাৰৰ বাবে দেখিবলৈ পোৱা যাব এই প্ৰযুক্তি।
কেন্দ্ৰীয় মন্ত্ৰীগৰাকীয়ে এই বিশেষ ৰে’লখন বিশ্বৰ অন্যতম দীৰ্ঘতম আৰু শক্তিশালী ৰে’ল হ’ব বুলিও সদৰী কৰিছে। অসমৰ সাংসদ অজিত কুমাৰ ভূঞাৰ এক প্ৰশ্নৰ উত্তৰত ৰাজ্যসভাত লিখিত উত্তৰত এই তথ্য প্ৰকাশ কৰিছে অশ্বিনী বৈষ্ণৱে। ভাৰতীয় ৰে’লৱেই পাইলট প্ৰজেক্ট হিচাপে এই হাইড্ৰ’জেন চালিত ৰে’ল নিৰ্মাণ কাৰ্য চলি আছে।
ৰিচাৰ্ছ ডিজাইন এণ্ড ষ্টেণ্ডাৰ্ডছ অৰ্গেনাইজেশ্যনৰ নিৰ্দেশনা অনুসৰি সম্পূৰ্ণৰূপে থলুৱা প্ৰযুক্তি ব্যৱহাৰ কৰি এই ৰে’লখন নিৰ্মাণ কৰা হৈছে বুলি জানিবলৈ দিয়ে মন্ত্ৰীগৰাকীয়ে৷ আৰু প্ৰয়োজন অনুসাৰে হাইড্ৰ’জেন পুনৰ ভৰ্তিকৰণৰ বাবে বিশেষ আন্তঃগাঁথনি সৃষ্টি কৰা হ’ব বুলিও প্ৰকাশ কৰিছে অশ্বিনী বৈষ্ণৱে।
ইয়াৰ সমান্তৰালকে কেন্দ্ৰীয় মন্ত্ৰীগৰাকীয়ে বিগত তিনিটা বিত্তীয় বৰ্ষত ইন্টিগ্ৰেল ক’চ ফেক্টৰীয়ে মুঠ ৬৪০ টা বন্দে ভাৰতৰ ডবা নিৰ্মাণ কৰিছে বুলিও উল্লেখ কৰে। কাপুৰথালাস্থিত ৰে’ল ক’চ ফেক্টৰীএ যোৱা তিনি বছৰত মুঠ ৫৪১৪টা ডবা নিৰ্মাণ কৰিছে বুলি জানিবলৈ দিয়ে অশ্বিনী বৈষ্ণৱে। আৰু ভাৰতীয় ৰে’লৱেই ২০৩০ চনৰ ভিতৰত কাৰ্বনমুক্ত কৰি প্ৰদূষণ নিয়ন্ত্ৰণ পদক্ষেপৰ অন্যতম অংশ হিচাপে হাইড্ৰ’জেন চালিত ৰে’লসেৱা মুকলি কৰিছে।
Continue Reading
