ডিজিটেল ডেস্কঃ নতুন বৰ্ষৰ আৰম্ভণিতে ভাৰতীয় শ্বেয়াৰ বজাৰত সৃষ্টি হৈছে এক আচৰিত পৰিস্থিতি । বিদেশী বিনিয়োগকাৰীয়ে এক বিশাল পৰিমাণৰ ধন উলিয়াই নিয়াৰ ফলত শ্বেয়াৰ বজাৰখনে তীব্ৰ অনিশ্চয়তাৰ সন্মুখীন হৈছে।
বিগত এটা সপ্তাহতে মাত্ৰ বিদেশী পৰ্টফলিঅ’ বিনিয়োগকাৰীসকলে ১৯,৭৫৯ কোটি টকাৰ শ্বেয়াৰ বিক্ৰী কৰিছে, আৰু জানুৱাৰী মাহটোত ইতিমধ্যে ৬৪,১৫৬ কোটি টকা উলিওৱা হৈছে। এই ধনৰ প্ৰবাহ বাহিৰলৈ যোৱাত শ্বেয়াৰ সমূহৰ মূল্য ক্ৰমে হ্ৰাস পাইছে, আৰু টকাৰ মূ্ল্য বৰ্তমান নিম্নস্তৰত।
বিশেষজ্ঞৰ মতে, এই বিনিয়োগ হ্ৰাসৰ মূল কাৰণ আমেৰিকাৰ অভ্যন্তৰীণ ৰাজনৈতিক পৰিৱর্তন আৰু বিশ্ব অৰ্থনীতিৰ কিছু বৃহৎ পৰিৱর্তন। ড’নাল্ড ট্ৰাম্পৰ উভতি অহাৰ সম্ভাৱনা, আমেৰিকাৰ ট্ৰেজাৰী বণ্ডৰ সুতৰ হাৰ বৃদ্ধি, আৰু ডলাৰৰ শক্তি বাঢ়ি যোৱাৰ ফলত বিনিয়োগকাৰীসকলে আমেৰিকালৈ আকৃষ্ট হৈ আছে। ফলত, উদীয়মান বজাৰ—বিশেষকৈ ভাৰতৰ পৰা ধন উলিওৱা অব্যাহত আছে।
শ্বেয়াৰ বজাৰৰ এই অস্থিতিশীল পৰিস্থিতিৰ প্ৰভাৱ বহুদূৰলৈ যাব পাৰে। শ্বেয়াৰৰ দাম তীব্ৰভাৱে কমি যোৱাত বহু বিনিয়োগকাৰী ক্ষতিগ্ৰস্ত হৈছে। লগতে, টকা দুৰ্বল হোৱাৰ ফলত দেশত মুদ্রাস্ফীতি বৃদ্ধি হোৱাৰ সম্ভাৱনা আছে, যিয়ে সৰ্বসাধাৰণ জনতাৰ ওপৰত আৰু অধিক অৰ্থনৈতিক চাপ সৃষ্টি কৰিব। এই পৰিস্থিতি যদি অব্যাহত থাকে, তেন্তে ভাৰতীয় বিনিয়োগকাৰীসকলেও তেওঁলোকৰ ধনৰ বৃহৎ অংশ বিদেশী বজাৰত বিনিয়োগ কৰিবলৈ বাধ্য হ’ব পাৰে।
বিশেষজ্ঞসকলে কৈছে, যদি চৰকাৰে কিছু সঠিক পদক্ষেপ গ্ৰহণ কৰে—যেনে বিনিয়োগ নীতিৰ সুসংগঠিত পৰিৱর্তন, বিনিয়োগকাৰীৰ আস্থা বৃদ্ধিৰ বাবে পদক্ষেপ, আৰু মুদ্ৰানীতি সুস্থিৰ কৰা—তেতিয়াহে শ্বেয়াৰ বজাৰ আৰু টকাৰ মূল্য আগলৈ সুস্থিৰ হ’ব পাৰে। চৰকাৰে কি পদক্ষেপ ল’ব, সেইটো এতিয়া আগন্তুক দিনৰ মূল চৰ্চাৰ বিষয় হৈ পৰিছে।
Continue Reading
