ডিজিটেল ডেস্কঃ ভনীয়েকৰ বিয়ালৈ মাজত আছিল মাত্ৰ সাতটা দিন। ইতিমধ্যে বিয়াৰ বাবে সম্পূৰ্ণ হৈ উঠিছিল সকলো যা-যোগাৰ। কিন্তু হঠাতে পৰিয়ালটোলৈ নামি আহিল ঘোৰ অমানিশা। আকস্মিকভাবে মৃত্যু ঘটিল একমাত্ৰ উপাৰ্জনক্ষম ব্যক্তি গৰাকীৰ। এই ঘটনা বাক্সা জিলাৰ ভাৰত-ভূটান সীমান্তৰ উত্তৰকুছিৰ।
উত্তৰকুছিৰ কৃষ্ণ বাহাদুৰ লামাই ভনীয়েকৰ বিয়াৰ বাবে আহিছিল একৈশ দিনৰ ছুটিত। অসম আৰক্ষীৰ ২৮ নং বেটেলিয়নত কৰ্মৰত কৃষ্ণ বাহাদুৰ লামাই ভনীয়েকৰ বিয়াৰ বাবে সম্পূৰ্ণ কৰি তুলিছিল সকলো যা-যোগাৰ। কিন্তু যোৱা ২৬ ফেব্ৰুৱাৰীত আকস্মিকভাবে অসুস্থ হৈ পৰে কৃষ্ণ বাহাদুৰ লামা।
পৰিয়ালৰ লোকে প্ৰথম অৱস্থাত ডাঃ ৰবি বড়ো অসামৰিক চিকিৎসালয়ত ভৰ্তি কৰে যদিও অৱস্থা গুৰুতৰ হোৱাত গুৱাহাটী চিকিৎসা মহাবিদ্যালয় হস্পিতাললৈ প্ৰেৰণ কৰে। কিন্তু দূৰ্ভাগ্যজনকভাবে আদবাটতে মৃত্যুক আকোঁৱালি লয়। যাৰ ফলত এতিয়া উত্তৰকুছিৰ ঘৰখনত সৃষ্টি হৈছে শোকৰ বন্যা।
শোকত ভাগি পৰিছে পৰিয়ালৰ লোক। নিজৰ ভনীয়েকৰ বিয়াৰ প্ৰস্তুতি চলাই হঠাতে চিৰদিনৰ বাবে আঁতৰি গ'ল কৃষ্ণ বাহাদুৰ লামা। উপভোগ কৰিবলৈ নাপালে ভনীয়েকৰ বিয়া। আজি পুৱা অসম আৰক্ষী বেটেলিয়নজনৰ মৃতদেহটো ঘৰ আহি পোৱাৰ পাছত ৰাইজৰ উপস্থিতিত সম্পন্ন কৰে অন্ত্যেষ্টিক্রিয়া।
Continue Reading
