১ কেজি মাছৰ দাম ৪৫ হাজাৰ টকা!মাছ কিনিবলৈ ক্ৰেতাৰ হেতা-ওপৰা, ক'ত?

ডিজিটেল ডেস্কঃ যিখন দেশত এসাঁজ ভাত যোগাৰ কৰিব নোৱাৰি অনাহাৰে অনেক লোকে দিন কটায় সেইখন দেশতে এক কেজি মাছৰ দাম ৪৫ হাজাৰকৈ দি ভাত খোৱা মানুহো আছে। এক কেজি মাছৰ দাম ৪৫ হাজাৰ বুলি ক'লে শুনিবলৈ আচহুৱা যেন লাগে নহয়নে? আচহুৱা বা অবিশ্বাস্য যেন লাগিলেও এয়াই পিছে সত্য। আমাৰ চুবুৰীয়া ৰাজ্য পশ্চিমবংগৰ সুন্দৰবনত এক কিলোগ্ৰাম মাছ বিক্ৰি হৈছে ৪৫ হাজাৰ টকাকৈ। পিছে কিয় ইমান দামী এই মাছ?

সুন্দৰবনত কাচিৎহে এই মাছবিধ পোৱা যায়। সেয়েহে ইয়াক অতি দুৰ্লভ প্ৰজাতিৰ মাছ বুলি গণ্য কৰা হয়। মাছবিধৰ নাম হৈছে কেনিং মাছ। কেনিং মাছৰ আছে বহু ঔষধি গুণ। শেহতীয়াকৈ এটা বৃহৎ আকাৰৰ কেনিং মাছমৰীয়াৰ জালত উঠিল। সাত ফুট দৈৰ্ঘৰ এই মাছটোৰ ওজন ৭৮ কিলোগ্ৰাম। অতিকায় মাছটো লৈ অনা হ’ল সুন্দৰবনৰ বজাৰলৈ। ইমান বিশাল আকৃতিৰ মাছ বজাৰলৈ অহাৰ খবৰ বনজুইৰ দৰে বিয়পি পৰিল। মাছটো চাবলৈ অগণন লোকে ভিৰ কৰি হেতাওপৰা লগালে।

আৰু পঢ়কঃ শ্বাহৰুখ খানে বিজেপিত যোগদান কৰিলেই ড্ৰাগছ চেনি হৈ পৰিব! কোন মন্ত্ৰীৰ এই মন্তব্য?

মাছমৰীয়াসকলে ইয়াৰ মূল্য কেইবালাখ টকা হ’ব বুলি ধাৰণা কৰিছিল। বজাৰলৈ নিয়াৰ পিছতে ক্ৰেতাই মাছ ক্ৰয় কৰিবলৈ ভিৰ কৰিলে। অৱশেষত প্ৰতি কিলোগ্ৰামত ৪৫ হাজাৰ টকাকৈ মাছটো বিক্ৰী হয়। ৭৮ কেজিৰ মাজটো কটা-বচাৰ পাছত অতি সোনকালে এক কেজি, এক কেজিকৈ কিনি ঘৰলৈ লৈ যায় ধনী ধনী গ্ৰাহকসকলে। বহু লোকে মাছটোৰ সোৱাদৰ পৰা বঞ্চিত হ'ল যদিও আপুৰুগীয়া কেনিং মাছটোৰ ফটো মোবাইলত বন্দী কৰাতে সন্তুষ্ট থাকিল।